ازاي اكتب اغنية موزونة وسليمة

ازاي اكتب اغنيه موزونه وسليمه

حد عايز يكتب اغنيه لازم تكون قايمه على فكره

يعنى مثلا ( الحب _ الرومانسيه _ الجرح _ الفراق ) والخ والخ ….

تجيب الفكره الى انتا عايز تعمل عليها اغنيه وتعمل عليها قصه

يجى هنا مكان موهبتك
لو انتا عندك موهبه هتعرف توظف القصه صح على العوامل الى هقولها دلوقتى

بعد ما جت الفكره فى دماغك وعايز تعمل عليها اغنيه

تحط قدامك 4 حاجات مهمه

1_ المذهب

2_ السنيو

3_ الكوبليهات

4_ التقسيم الجيد للاغنيه
اولا نيجى للمذهب

المذهب

المذهب بيكون اول الاغنيه وغالبا بيشرح فكره الاغنيه
ولو كان المذهب جميل بيشد المستمع ليه
واذا كان المذهب سىء يبقى لازم تعرف ان الاغنيه كلها وحشه
ومحدش هيقراها او يكملها
ولازم المذهب تحاول انه ما يكونش فى كلمات مستهلكه
يعنى حط الفاظ معانيها واضحه وجميله ومش مستهلكه
وهوريكوا دلوقتى انواع من تقسيمه للمذهب

______ ، ________
_______
______ ، ________
_______
زى اغنيه تامر حسنى عرفت الى فيها
مثال

عرفت اللى فيها ،…… عنيه بان عليها
يا قلبى انه محبنيش

حاجات عشنا فيها ……، وعشمنى بيها
اخرتها ايه طلعت مفيش
مثال تانى
_________
_________
_________
_________
مثال بلاغنيه

كتير خانوك يا قلبى

وانت اللى سامحتهم

كتير جرحوك يا قلبى

ولا مره جرحتهم

تقسيمه تالته

________ ، _______ ، ________
__________
________ ، _______ ، ________
__________
وكمثال بالاغنيه اغنيه محمد علاء

ايه يا قلبى جرالك ايه ، كل يوم تسالنى عليه ، فوق بقى م اللى بقيت فيه
ده حبيبنا راح

كل يوم بتسيبه سهران ، عاش لوحده ليالى حيران ، حد غيره زمانه كان خان
وسابلك جراح
وفى نوع تانى من المذاهب وهو جديد شويه وفعلا جامد جدا والجمهور حبه
مكون من اربع شطرات الاولى والرابعه نفس القافيه والتانيه والتالته نفس القافيه
والرسم بتاعه اهو
___________
___________
___________
___________
زى اغنيه تامر حسنى ( انا بس متضايق )

انا بس متضايق
علشان بشوف ف عنيك
نظره صعبان عليك
وعليك ده مش لايق

دى امثله كتير على تقسيمه واوانواع المذاهب
واتمنى الاستفاده منهم
نيجى ثانيا للسنيو

والسنيو
هو الى بيتعاد كتير فى الاغنيه وبيبقى بعد المذهب على طول
وطبعا بيكون اقل من المذهب فى الشطرات والكلمات
عشان بيتعاد كتير فى الاغنيه فا لازم يبقى معانيه واضحه فى اقل كلمات

كمثال اغنيه تامر عاشور ( باينه ضاع)

السنيو فيها
جالنا الى احنا ماجاش على بالنا حتى ثوانى نفكر فيه
عمرنا مره ما قولنا ان شوقنا تروح عليه
والحلم الى بدايته بحبك تبقى نهايته وداع
قولنا هنفضل طول ايامنا حاسدنا العاشقين
كان حلمى انى اموت وانا جنبك بعد سنين جايين
بس الحلم باينه اتغير ولا باينه ضاع
والسنيو هنا جه من وجه نظرى كبير شويه عشان الاغنيه مش كبيره
يعنى مذهب وسنيو وكوبليه واحد
وعايزكوا تاخدوا بالكو من نهايته وداع.. وباينه ضاع
نفس القافله
وللشطرتين برضه

نفكر فيه
تروح عليه

حاسدنا العاشقين
سنين جايين

نفس القافله فى الشطرتين
مثال اخر اغنيه الكنج عمرو دياب ( قالتلى قول )
السنيو فيها
دى حكايه وخلصت مش عارف هتفيدنا بايه
دى حكايه وعدت ونسيتها فكراها ليه
حلفت لاقول وياريتنى قلت محبتهاش

خدوا بالكو من القافله هيا نفس القافله برضه

والسينيو ده طبعا بيتعاد بعد كل كوبليه فى الاغنيه واسمعوها تانى

وطبعا انتهى بنفس قافيه المذهب زى ما احنا شايفين
نيجى ثالثا للكوبليهات

والكوبليهات ما بتختلفش كتير عن المذهب
يعنى الكوبليه بيكمل المذهب لحد ما
وتقريبا بيكون نفس التقسيمه او بتغيير بسيط
مثال باغنيه

اغنيه تامر عاشور ( باينه ضاع )

المذهب فيها هو
خايف قرب جى علينا سامعه من بعيد .. جى يكسر احلى ما ليا واعيش بعديه وحيد
هو اليوم الى احنا حبيبى ما عملناش حسابه
كل ما عينى بتيجى فى عينك برجع للى كان .. وافتكر الكلمه الى ماليتنا بالشوق والحنان
ترجع تصعب نفسى عليا قلبى يزيد عذابه

دا كان المذهب

بصوا معايا بقى للكوبليه هيكون ازاى
سامع قلبى بيطلب منك تبقى قصاد عنيه .. يالى انا عمرى ما بشبع منك بس هنعمل ايه
يلا وداع ما هو كان على بابنا حبيبى ينادينا

عود نفسك وانا هتعود واياك تبكى يوم .. خليك فاكر انى انا فاكر دايما كل يوم
خد بالك منك دا نصيبنا فراق مكتوب علينا

شوفتوا تقسيمه الكوبليه
وشوفوا القافله والقافيه ليهم
متشابهه جدا جدا وبتنسيق واحد
زى المذهب بالظبط
اتمنى انكوا تستفادو بالمثال ده
علشان كده الاغنيه دى هتعيش …. ومحدش هينساها … ده غير انها نجحت نجاح رهيب

واللى انا بقوله ده مش قانون …. لالالالالالالا

ده مش مفروض يحصل بالنسبه للكوبليه ( انه ينتهى بنفس القافيه ) لكن لو حصل يبقى خير وبركه علشان الناس تتكيف لما تسمعها …
ومثال اخر للكينج عمرو دياب ( الليله دى )
بصوا الكوبليه بتاعها الجميل … واللى بنفس وزن المذهب
قالوا ياما ان القمر عالى وبعيد … والملايكه مستحيل تلميها ايد
وانا الليلا ديا كل ده فى ايديا … يمكن فى الدنيا دى اكون انا الوحيد
بصوا المذهب نفس الوزن

الليلادى سيبنى اقول واحب فيك … انسى كل الدنيا دى وغمض عينيك
ده انت نور حياتى عمرى كل املى ,,, شوق الدنيا كله مش كتير عليك