اشعار حامد زيد حب

رسائل اشعار حامد زيد حب و غرام

ماتقبلت الفراق وما ليدي فيه حيله
اه لو ان الظروف المقبله تكشف قدرها
لو يعرف الشخص منا وش مع الغيب ابيجي له
كان جنبنا المشاكل من قبل يوقع ضررها
ما هقيت الليله اللي جابت الفرقا طويله
لين صارت ليله امس بعيني اطول من شهرها
والعذاب اللي يذوب بعين من يفقد خليله
عندي اكبر من عذاب العين لو تفقد نظرها
والحبيب اللي صدوده مثل مداته جزيله
صد عني واعرفه لو صد عن حاجه هجرها
~~

لوتحب اكتب كتبت ولو تحب امحي محيت
وش بغيت امر تمنى لايغرك صغر سني
شايف انجوم الثريا جبتها لك لو بغيت
لو بعيش اعطي كفوفك مثل ماكفوفك عطني
لاتحسب اني بوفي لو عطيت ولوعطيت
اشهدني ماوفيت ولو وفيت انشهدني
قلت عن نفسي مقصرواشهدني ماوفيت
لانك اغلى من عروقي والوريد اللي سكني
واعتزازك تاج يبقى فوق راسي ماحييت
لاختلف فيك شخص ضنك لازم اخلف فيه ضني
وان رويت الماي بروى مثل مااضمى لاضميت
وانزعلت ازعل وابرضى لارضى قلبك لاني
واجب ازعل لازعلت وواجب ارضى لارضيت
انت مثل البحر تعطي والعطى ثقل وتاني
بس هو يعطي وياخذ وانت ماعمرك خذيت
~~

موت فيني واندفن فيك بثياب الحداد
وان حييت اموت لرضاك واحيا بك بهون
مره ارقد بالكفن وانت ترقد بالمهاد
ومره ارقد بالمهد وانت ترقد بالكفون
ادري ان شجونك شجون واعنادك عناد
والبلا ان عنادك عناد وشجونك شجون
ربك اللي سخرك لي تقود وما تقاد
والله الخالق ولله في خلقه شؤون
ازرع ضلوعي من رضاك وابشر بالحصاد
لعنبو من جيت ترضيه وترد امحزون
بس تسوالك بلد ؟ قول تسوالك بلاد
انت كل العالم بكون ولحالك بكون
~~

انا جيت اعشقك نبض ومشاعر ما اعشقك تمثال
انا جيت اسكنك واحياك وابقى فيك وابقى لك
انا جيت بظما عاشق تعب يطرد سراب اللال
انا جيت استفز رضاك من فرقاك والجا لك
انا ما همت بك عاقل انا كنت اعشقك بخبال
انا ما كنت احبك حي انا كنت اعشقك هالك
تخيل من كثر ما اخاف تلقى للزعل مدخال
اخاف اخطي على طيفك وادوس برجلي ظلالك
تبعتك والعرب تتبع رعود البارق الهمال
وانا شفت المطر يتبعك في حلك وترحالك
كان اللي خلق حسنك خلقني مع جسدك ظلال
وصرت اقرب جسد يمشي معك باقفاك واقبالك
~~

ماهقيت ان السعاده خيال في خيال
تروى قلوب الحبايب وقلبي ما روى
كنت ابشتال الهوى والهوى ثقل الجبال
وان تحملت الجبل ما تحملت الهوى
كنت ابسلى بالهوى والهوى صعب المنال
ما رضا لي حظي اللي طواني وانطوى
قلت لا فراحي تعالي ولا قالت تعال
والخفوق ان قلت ابقبل على صدي نوى
الله اكبر لا شرقت شمس يتلاها زوال
كيف ابفرح في صباح مع الليال استوى؟
لاحصل بالحب قسمه ولا جا لي مجال
غير اشوف معاند الجرح وعناد الدوى