اليوم قررت نحط ليكم الصور ديال البسطليه لي عملت و قبلوا علي اختكم يالله مبتدئه
على بركه الله
المقادير
دجاجه مقطعه + التوابل كامله الا التحميره + الزعفران + الكاوكاو مهرمش + 8 البيضات + ورقه البسطيله + كيلو البصله مقطعه + السكر سقيل و القرفه للتزيين و 3 ملاعق زبده مدابه
نخليكم مع الصور
الدجاج طايب مع العطريه و الزيت و البصله
نزولوا الدجاج من المرق باش يتسقطر و ينشف تماما
البصله لي بقات لينا في الطنجره نضيفوا عليها 8 البيضات و نخليوها حتى تنشف مزيان من المرق لي فيها
نمروا للدجاج و نقيوه مزيان من العظام لي فيه
نوجدوا ورقه البسطيله ، انا عملتها غير في الدار ، المقادير هما الدقيق و شويه الملح و العجينه كتكون بحال ديال البغرير و نعملوها في مقلاه طيفال مباشره فوق نار مهييييييله بزاف او عملي حمام ماريا و حطي فوقو المقلاه كلتا الطريقتين تينجحوا
المرق ملي ينشف مزيان نوضعوه حتى هو في مصفاه يتسقطر الا بقات فيه شي حاجه ثم نضيفوا عليه السكر سقيل جهد 4 ملاعق كبار و نوضعوه جانبا
نهرمشوا الكاوكاو و نضيفوا ليه حتى هو ملعقه كبيره سكر سقيل و شويه من البصله لي عملنا باش يعقاد شويه لانه تيكون مفرق و البصل غادي يجمعوا شويه
ناخدو المول ديال البسطيله و نفرشوا الورقه و ندهنوها بالزبده و نفرشوا التفريشه الاولى لي هي الدجاج
و نوضوعوا فوقوا الورقه و ندهنوها كدلك بالزبده
و نضيفوا التفريشه الثانيه لي هي البصل و البيض و نوضوعوا فوقوا الورقه ثم التفريشه ديال الكاوكاو و نغطيو البسطيله بالورقه من جميع الجوانب
نخليكم مع الصور
ندهنوا البسطيله بالزبده و ندخلوها للفرن و ها البسطيله واجده و لديده بزاف
