المطبخ هو اكتر حاجه بتتبهدل في البيت وفي نفس الوقت اكتر حاجه بتقضي فيها وقت واكتر حاجه بتاخد منك مجهود وبتعمل عليكي ضغط لو مش مترتبه ومتنضفه
علشان كده لازم تاخدي بالك منه وتحسنيه علشان تحسني نفسيتك وتخرجي منه سعيده ومبسوطه وبالتالي تنشري سعادتك في بيتك, وده مش هيحصل الا لو كان مرتب ونضيف طول اليوم ويفتح النفس
ازاي تحافظي على مطبخك كانه اوضه عاديه طول اليوم مفيهوش روايح غير مرغوب فيها ولا كركبه ويبقى مستعد لاستقبال الضيوف ؟
دي 4 مراحل تخليكي ترتبي مطبخك من اول وجديد وتعرفي ازاى تحافظي عليه وبعدها مش هتحتاجي تاني تعملي حمله عليه علشان تروقيه من اوله لاخره لانه ببساطه هيبقى على طول متروق ونضيف
الاربع مراحل دول هما:
ودي اهم مرحله
المرحله الاولى : الجرد
اول حاجه لازم تعرفيها هي (انا عندي ايه في المطبخ)؟
فايدتها: كتير اوى بيبقى المطبخ مليان على اخره حاجات ونكتشف في الاخر اننا مش بنستعملها وواخده مكان على الفاضي ومخلياكي تطلعي الحاجات الي بتستعمليها برا على الرخامه علشان كده الدنيا بتتكركب معاكي , لان في حاجات ملهاش لزمه واخده المساحه في الدرف
طيب نحلها ازاى؟
انا هريحك واقولك المحتويات اللي المفروض تبقى موجوده في المطبخ :
1- ادوات الطهي:
اواني الطبخ (الومنيوم او استانليس او تيفال او صاج) : يعني كل ما هو بيتطبخ فيه ^_^ , وكذلك البراريد والكنك
اختاري اللي بتستعمليه بس وحطيه بلاش العرض اللي بنعمله في الدرف علشان الضيوف لما ييجوا ^_^, وشيلي الزياده عليكي في كراتين نضيفه تحت اي سرير لحين ما تحتاجيها, ولو انتي عروسه ولسه بتجهزي نصيحتي ليكي متشتريش غير على اد استعمالك بسسس كلام الناس مش هينفعك لما تلاقي بيتك مزحوم!)
2- اواني التقديم:
هي الاطباق والملاعق والشوك والسكاكين وطقم التوزيع والصواني اللي بتطلعي عليها الحاجه , ونصيحه لو حتى عندك 50 طقم للاكل خلي بس طقم او اتنين في المطبخ تنوعي ما بينهم في التقديم والباقي حطيه في البوفيه علشان الزحمه , وكل ما تحبي تنوعي شيلي طقم وهاتي واحد تاني مكانه
من فوايد الطريقه دي كمان انك مش بتلاقي ادامك اطباق كتيره فكل ما تعملي اكله تعرفي في طبق جديد وتطنشي اللي في الحوض من كتر اطباقك ^_^ وطبعا يتكوم عليكي مواعين بالهبل
3- اواني الشرب:
وانصحك تخلي بس في المطبخ :
طقم كبايات وشفشق عصير
طقم كبايات شاي
مجات للشاي والنسكافيه على حسب عدد الموجودين في البيت (يعني لو انتو 2 اخرك اخرك تطلعي 4 مجات والباقي على البوفيه عدل ^_^)
كبايه للماء
4- منتجات مستعمله في الطهي:
وهي كل الحاجات اللي بتستعمليها وانتي بتطبخي ومبتتشالش في التلاجه زي: سمنه – زيت – خل
5- الاجهزه :
الخلاط والكبه والمضرب والغلايه وقطاعه الخضار وخلافه
6- الفوارغ:
ودي ايااااكي ثم اياكي يبقى عندك فوارغ كتيره مبتعمليش بيها حاجه وسيباها , شيلي لنفسك من كل نوع على اد استعمالك فقطططط والباقي على الزباله عدل , يعني مثلا 3 برطمانات وسط – 2 كبيره – 2 صغيره , ومتزوديشش عن استعمالك وبلاش كلمه (خليه يمكن ينفع)
7- الخزين:
هو كل الاكل اللي بتشيليه مخزن في المطبخ وبردو مش بيتشال في التلاجه وهو انواع :
1- خزين الخضار :
زي البطاطس والبصل
2- الخزين الخاص بالطبخ:
الارز – السكر – المكرونه – الشعريه – الحبوب بانواعها (فول – عدس – قمح بليله – الخ ^_^) وكمان المعلبات زي الصلصات – الطحينه – زيت الزيتون , وهكذا
3- خزين الحلويات:
تمر – عصاير – كيك – علب جيلي او ايس كريم , وهكذا
4- خزين المشروبات :
شاي – نسكافيه – علب اعشاب (ايزيس او غيره, او بدالها برطمانات للاعشاب السايبه ) – علب لبن
5- خزين التوابل:
جميع انواع التوابل اللي بتحتاجيها سواء كانت في برطمانات او اكياس
8- ادوات النظافه :
اسفنجه الاطباق
اسفنجه الجلي للحلل وما شابه, نصيحه دي انضف مليون مره من السلك وبتنضف زيه واكتر كمان بس بتتميز بانها بتعيش ومبتطلعش ريحه سيئه زي السلك
جوانتي سكوتش برايت او اريكس مطاطي , بيعيش معاكي كتييييييير ومبيتقطعش الا بعد حوالي سنه او اكتر وممكن تعملي بيه كل شغل البيت
اسفنجه الكبايات , ومتستغربيش ان لكل حاجه حاجه , علشان خاطر تفضل نضيفه والروايح متبقاش مختلطه بطريقه تقرف ^_^
اسفنجه تنظيف مسطحات المطبخ (الرخامه – الدرف من برا – باب التلاجه ) , ودي ممكن اي نوع من اللي فوق وانا افضل اللي زي بتاعت الاطباق
سائل تنظيف الصحون
صابون لايديكي
ولو عندك مكان في المطبخ ورا الباب او جنب التلاجه حته مستخبيه كده ممكن تحطي بقيه ادوات النظافه بتاعت البيت : الفرشاه – الجاروف – المقشه – الزعافه – المنفضه
9- الاكياس البلاستيك:
طبعا احنا المصريات منقدرش نعيش من غير رزمه اكياس متسالينيش بنعمل بيها ايه ^_^ , علشان كده انصحك بطريقه حلوه للجرد والتصنيف :
الاكياس على نوع من 3:
1- نوع للمهملات:
انصحك تستمعلي اللي بتشتري فيه البقاله (بتاع السوبر ماركت) او بتاع فتح الله وكارفور وكده , منها توفير ومنها انك تستعملي اللي عندك , ومنها ان احجامهم صغيره فتخليكي ترمي الكيس اول باول وميتكونش في مطبخ اي روايح غير مرغوب فيها
2- نوع لتعبئه الاغراض في الفريزر او لرمي الزيت في المهملات بعد استعماله (يتحط في كيس صغير وتربط عليه كويس اوى وترميه في المهملات بدل ما تدلقيه في الحوض ويسده), والنوع ده اللي بيكون حجمه صغير وطبعا مش مخروم ^_^
3- اكياس تنفع للخروج الي هي بتاعت محلات الهدوم والكلام ده , ودي خليها برا المطبخ خالص في درج مثلا في النيش او اى درج فاضي عندك
دلواتي تطلعي زي الشاطره كده كل الاكياس الي عندك وتصنفيها لواحد من التلاته دول , واهم حاجه يكون كيس كويس ومش مقطوع , الي يناسب المهملات تحطيه في كيس منهم والي يناسب النوع التاني تحطيه في كيس وسط علشان يقضيهم , والتالت على برا , واللي ملوش لزمه يترمي على طول , وتاخدي الكيسين اللي هينتجوا ليكي من الموضوع ده (هيبقى واحد لاكياس المهملات والتاني للاكياس الصغيره ) وتخليهم على جنب لحد ما تلاقيلهم مكان حلو في درفه محندقه كده في المطبخ ^_^
10- فوط المطبخ :
وما ادراك ما فوط المطبخ ….
بصي يبقى عندك 3 انواع فقط في المطبخ لا غير , وعايزه تعرفي ست البيت دي نضيفه وللا لا بصي على فوطه مطبخها واحكمي ^_^ , الانواع دي هي:
1- نوع تنشفي فيه ايديكي وهي نضيفه , يعني مثلا دخلتي غسلتي كبايه وبعدين غسلتي ايدك بالصابونه تنشفي فيها (مينفعش تنشفي في الفوطه الي بتمسحي بيها الرخامه او بتمسكي بيها الحلل ^_^)
2- نوع تنشفي فيه ايديكي وهي ريحتها طبيخ ^_^ ,بمعني انك مثلا بتقشري توم في وسط الطبخ , طبعا مش لازم كل حاجه تمسكيها بعده يبقى ريحتها توم علشان كده تروحي تغسلي ايدك (انشالله بالميا^_^) وتنشفيها في الفوطه دي (يعني هي فوطه مخصصه للروائح المطبخيه )
والنوعين دول الي بيبقى شكلهم زي كده
3- نوع بتمسكي بيه الحلل ولو اني انصح بالحاجات اللي بتتشري للغرض ده مخصوص (بتبقى زي سفنج كده مغلف بقماش) ودول تحطيهم لوحدهم على جنب متلمسيهمش غير لمسك الحلل والحاجات السخنه ^_^
وطبعا الفوط دي بتحطيها في الغساله مع الهدوم اللي بتتغسل على حراره عاليه علشان تنضف وتبقى ريحتها حلوه وتشيليها بردو في المطبخ في مكان معين.
متهيالي كده منستش حاجه من مكونات المطبخ وقسمناها لاقسام , دلواتي بعد الجرد اي حاجه ملهاش قسم تترمي برا ^_^
