حمام عروسه حمام مغربى
عروسه جديده وعلى وش جواز، يبقى اكيد نفسك ان بشرتك تكون ناعمه ونضره مش كده وبس، دي انت اكيد نفسك كمان تتخلصي من الاماكن الغامقه الموجوده في بعض اجزاء الجسم واكيد طبعا عماله تسالي اصحابك عن مراكز تجميل بس انت خايفه تروحي لعدم تاكدك من مستوى النظافه اللي ممكن يكون موجود هناك، بالاضافه الى ان المراكز دي بتاخد فلوس كتيره جدا وانت مش عامله حسابك عليها..
, فنانيس سليم خبيره التجميل ولفات الطرح تقدم لك هذه الماسكات لتحصلي على نفس النتيجه التي تحققها هذه المراكز بس في البيت.
اولا: حمام البخار لبشره الوجه :
حمام البخار من الحمامات المعروفه جدا لبشره الوجه، لانه بينشط الدوره الدمويه في البشره ، وبيفتح المسام لتتخلصي من الافرازات الدهنيه والرءوس السوداء اللي ممكن انها تكون موجوده على وجهك..
وكل اللي هتحتاجي له:
1- شيح “من عند العطار”.
2- مياه.
3- فوطه كبيره .
الخطوات:
1- سيبي الشيح يغلي في حله متوسطه الحجم.
2- بعد ما تتاكدي ان المياه وصلت لمرحله الغليان حطي الفوطه على راسك وافرديها كويس وشيلي “الحله ” من على النار وقربي وجهك من “الحله ” علشان وجهك يلاقي البخار اللي طالع من “الحله “.
3- سيبي البخار يتسرب لبشرتك لمده 10 دقائق، ولو حسيت ان بشرتك تعبت من البخار ممكن انك تريحي شويه وبعد كده ترجعي تاني تكملي.
4- بعد مرور ال10 دقائق امسحي بشرتك باسفنجه ناعمه مبلوله بميه ساقعه .
ثانيا: حمام الثلج لبشره الوجه
لو كنت بتعاني من وجود سواد جامد جدا في المنطقه اللي تحت العين يبقى عليك وعلى حمام التلج، وعلى فكره حمام التلج منعش جدا للبشره .
كل اللي هتعمليه:
قطعه تلج متوسطه الحجم.
الطريقه :
امسكي قطعه الثلج ومرريها على وجهك في حركات دائريه سريعه ، طبعا في البدايه هتحسي انك مش قادره تستحمليها لكن بعد كده هتلاقي نفسك مستمتعه جدا استمري لغايه ما الثلجه تدوب واول ما تخلصي هتلاقي وشك بقى لونه وردي وهتحسي انه منتعش جدا..
اما بالنسبه للحمام المغربي للجسم :
المفروض تعمليه قبل فرحك بيوم على الاقل حمام المغربي طبعا فوايده كثيره لانه بيزيل الخلايا الميته من الجسم وبيفتح مسام البشره ليخلصها من الحبوب والدهون بس اهم حاجه خلي بالك منها هي انك قبل الحمام تشربي كميه كبيره من السوائل ؛ وده لان الجسم بيفقد سوائل كتيره ؛ بسبب البخار والحراره العاليه وبكده ممكن تصابي بالهبوط.
وكل اللي هتحتاجي اليه:
1- ماء ساخن جدا.
2- ليفه مغربي خشنه “هتلاقيها في الصيدليات الكبيره “.
3- صابونه مغربي “هتلاقيها في الصيدليات الكبيره “.
الطريقه :
1-اقفلي اي منفذ للهواء في الحمام “الشباك والباب”.
2- جيبي طبق وامليه مياه سخنه جدا وحطي فيه اللوفه المغربي.
3- افتحي المياه السخنه في البانيو على الاخر لغايه ما يبقى فيه بخار جامد في الحمام، وبعدين سدي البانيو واملي نصه من المياه السخنه .
4- اقعدي في البانيو لمده نص ساعه علشان جسمك يتعرض لاكبر قدر من البخار.
5- هاتي الصابون المغربي وابدئي في فركه بالراحه على جسمك، وده علشان بشرتك ما يحصلش لها التهاب
6- سيبي الصابون على جسمك لمده 10 دقائق.
7-اشطفي جسمك بالمياه السخنه وبعدين حطي كميه ثانيه من الصابون بنفس الطريقه السابقه وسيبيه برضه لمده 10 دقائق.
8- ممكن تستفيدي بالفتره دي في تنظيف الكعبين بالحجر الخاص بالقدمين “هتلاقيه عند العطار”.
9- بعد مرور 10 دقائق اشطفي جسمك من الصابون بالمياه السخنه .
10- امسكي الليفه المغربي وابدئي في دعك جسمك ماعدا منطقه الوجه بشكل دائري، اثناء دعك جسمك هتلاقي ان الخلايا الميته في الجسم بتتشال وبتقع على الارض بمنتهى السهوله .
11- اشطفي جسمك كويس بالمياه السخنه ، واوعي تسمعي كلام اي حد يقول لك انك تستخدمي عطور او اي مستحضرات تجميل او كريمات في الحمام المغربي؛ لان كل الحاجات دي فيها مواد كيميائيه ممكن انها تضر بشرتك.
ملحوظه : ممكن تجيبي كمان الدلكه السوداني “موجوده عند العطار” وابدئي في فرك جسمك كله بيها، فهى عباره عن عجينه من مكونات عطريه واعشاب واخشاب ثمينه غطى بها كل الجسم، وعلى فكره الدلكه دي مهمه جدا لانها بتكسب الجسم لمعان ولون وردي..
سيبي الدلكه على جسمك لمده ربع ساعه وبعد كده اشطفي جسمك بالماء الفاتر المضاف اليه ماء الورد.
