شعر حب عراقي

شعر حب عراقي

هذه بعض الاشعار العراقيه التي قيلت في الحب

موعد حب

هو / اشلونچ يا اعز الناس عندي .. هو الگلب چم احبيبه عنده ..

هي / هزني الشوگ عالموعد اتانيك ..

واعد بيدي الدقايق وحده وحده ..

وحده .. اثنين .. هاي الثالثه تروح ..

اتاني وصار هالموعد اشبعده نمت حسبالي اشوفك بالحلم جاي ..

وگلت دمعاتي احطهن وسط خده

هو / نمتي .. هنيالچ غفيتي ..

وانه ليلي يمر على عيوني صبح الينيم ورده ويمسد عليها..

مو مثل ليلولي وينيم جرح .. !!

والغفه ابكلمه محنه ..

مو مثل الينام وبعينه ملح ..!!
هي / لا حبيبي ..

انه هذا الليل من يمرني دمعه ..

وحزن.. واشواگ .. وحنين انه عيني عليك ما بطل دمعها ..

تبچي ما تسكت العين ..
هو / لا .. لا تبچين ..

امسحي دمعتچ وارجوچ لا تبچين ..

يل دمعچ جمر وخدودچ احلى اورود ..

خايف على اخدودچ من دموع العين ..

لا تبچين ..

ورده وتحترك ما تحمل النيران ..

يذبل كل ورگها وتستحي من الطين ..
هي / وانت تگلي لا تبچين ..

مو عمري انتهى .. وايامي كلها اتروح ..

لو راح العمر متگلي اجيبه امنين ..؟
هو / لا تبچين ..

المن بعد المن تسوه دمعه اتطيح ..

هو اشباقي بينا ونحترگ كل حين ..

تعبنا القهر ممشى جزيره وخوف ..

صار الماضي غلطه وچنه غلطانين !!

لا تبچين لو يسوه العمر يمكن بچينا اسنين ..
هي / اشلون اتگلي لاتبچين ..
هو / لا تبچين ..!!
هي / تدري انت اليحب ما يگدر اعله النار ..

ويا نار اللي بيه اتفزز الميتين ..

احتاج الدمع من ما اشوفك يوم ..

لان يصبح علي اليوم خمس سنين ..!!

حبيبي لخاطري ..

لا تبتعد ارجوك ما احمل فراگك ..

تدري كلش زين ..
هو / بس ارجوچ لاتبچين ..

خوفي انه عليچ من الدمع والله ..

مرات الدمع ياخذ حلاه العين ..

ويل كلچ ترافه ارجوچ لا تبچين

برد تموز حبك من يمر صيف

وحر تشرين يانار اشتياقي

راقي ما شفت بس انته والله

والغيرك چذب من گال راقي

وكافر بالعشگ ماعندي الايمان

بس بعدك نعم صار اعتناقي

واحساسي نبي من راد يهواك

كسر كل هبل قبل التلاقي!

يا شعري وقضيتي والمكاتيب

ياسهر الليالي واحتراقي

الك كل العمر ومقصر وياك

يا بيتي و محلتي وكل زقاقي

وعليك العين تعمه لو غبت يوم

ويحالي شلون لو طال الفراقي

لا تبعد علي ياسلوه الروح

وعهدي اوياك اسمعه واتفاقي

على هذه الگلب كثره اليمرون

وعيونك فقط بس انته باقي

وصحيح انته حلو وهواي عشاگ

لكن يختلف عشگ العراقي

صدگ يختلف عشگ العراقي

خربت من شفت جنحان عند الفيل .. ومن شفت النوارس صارت ذيابه

وخربت من شفت مره الاسد مرعوب .. خايف ما طلع بالليل للغابه !

مجنون الزمن لو عقلي المجنون .. هذا الشفته من هو اليعرف اسبابه؟

وجبت ايدي غصب گتلهه فركي العين .. بلكي مو صدگ وينچ يا سبابه !

تالي اتيقنت موبس حلم لا طيف .. واقع حال بس ظنوني مرتابه

شفت الناس .. بعض الناس .. غير الناس .. شفت الناس نفس الشفته بالغابه

واحد من يهد ويهد گبل بالسيف .. عاف السيف هسه وينخه بگراب

واحد مقتنع يوسف كلاه الذيب.. وتگله چذب وايگول لا يابه

واحد ما دره .. ما يعرف الي صار .. شاهد راح لمن صارت اطلابه

واحد ينسال تعرفهه بت فلان .. جاوبهم چذب وايگول حبابه

واحد چان واحد هسه صار اثنين .. لان وجهين عنده وغاش اصحابه

او .. واحد ..

او .. واحد ..

او .. واحد ..

والاضرب بعد سالوا طفل بالعيد.. شتحب تشتري.. شنجيب لعابه؟

دبابه صرخ يلعب حرب وايريد ميعيد اذا ماعنده دبابه !

وطفل ثاني شرد يرضع شوارع گام.. ويكره للاسف مدرسته وكتابه

وطفل ثالث .. وطفل رابع .. وطفل خامس ..

واخيرا

مجنون الزمن فعلا طلع دولاب .. وبكيفه يفر لو راد دولابه ..

وبكيفه يفر لو راد دولابه