ما تشتغل بشهادتك احسن اهو على الاقل هتبقى ضامن مرتب ثابت كل شهر ويا سلام لو عرفت تبقى موظف حكومى بعقد عشان بعد 20/30 سنه لما تعجز يبقى لك معاش 800 جنيه تؤمن بيهم مستقبل عيالك
خلينى اقولك الاول ان اللى بيشتغلوا اون لاين نوعين
1 . نوع بيخلق فرص العمل Entrepreneur بطبعه
2 . نوع بيحاول يحقق نجاحات وقتيه وسريعه Freelancer
النوعين دول عندهم حاجه اسمها ” حريه ماليه ” بمعنى ان اكثر من 85% من الشباب اللى عنده 18 سنه فيما فوق مهما كان نوع شغله اللى بيعمله اون لاين فهو تقريبا بطل ياخد مصروف من ابوه وامه وبطل يبرر هو بيصرف فلوسه فى ايه ويمكن دى اهم شويه من النقطه الاولى … حر مالك … حر ذاتك :)
بس السؤال اللى بيطرح نفسه احنا بنشتغل اون لاين ليه اصلا ؟
ايه اللى يخلي شاب فى بدايه العشرينات يبقى مستقبله منحصر فى شاشه كومبيوتر !
الانترنت هو المجتمع الوحيد اللى مش مرتبط بجنسيه او باهليه ، بمعنى انك مش هتلعن حظك السيئ وظروفك اللعينه اللى خليتك تتولد فى مصر ولا فى المغرب ولا فى تونس ، مش هتكره اهلك عشان متعلمتش فى مدارس International زى صاحبك اللى شغال فى Orascom Telecom ، هنا كل حاجه ليها سكه ، التعليم مفتوح مش مرتبط بوقت ولا مكان ولا امكانيات …
كل هدف نفسك تحققه هو ممكن لان مفيش واسطه من Mark Zuckerburg هتخليك يبقى عندك 10 مليون Fan زى Asa7be Sarcasm Society ولا مبدع وعندك ربع مليون Follower وشركات الميديا بتتهافت عليك زى Amr Mustafa Sokkar هنا كل واحد يقدر يبقى اللى هو عايزه.
مفيش مصلحه حكوميه تروح تخلص فيها ورق الويب سايت ، مفيش تاخير الدنيا سريعه الفكره تقدر تبدئ فيها النهارده مش بعد ما تاخد التصريح وتخلص السجل التجارى …
عشان كده هتلاقى كثير اوى بيشتغلوا عالنت ، لان مجتمعنا عنده 7000 سنه واحنا شباب اكبرنا فى التلاتينات مينفعناش نظام سيبها وخدها بكره احنا عايزين كل حاجه النهارده … دلوقتى لو ينفع!
الشغل اون لاين مش سبوبه ومش سهل ، اقل واحد فينا بقاله سنه او اتنين بيتعلم ولسه مدخلش فلوس تعيشه كويس ، بس ميزه المجال ده انه مفيهوش ” Limited Capacity ” مفيش حاجه اسمها سورى معلش احنا عندنا فى مكانك كثير مش هنقدر نشغلك .
اى حد يقدر يبدئ من الصفر يتعلم ويتعب على نفسه وهيلاقى مكان لنفسه يحقق فيه اللى بيحلم بيه طالما عنده استعداد يتعلم ويستحمل ويكمل …
خلال ال 30 ثانيه اللى قريت فيهم البوست ده عايز اقولك ان ادفع اون لاين حوالى 1,201,173 مليون دولار فى مواقع ال eCommerce بس ، غير الاشتراكات المدفوعه والتحويلات المباشره اللى ممكن توصل ل 5 مليون دولار فى الدقيقه الواحده
احنا بنبقى مبسوطين لما نتاكد انكم مش فاهمين احنا بنعمل ايه ، لان ده بيخلينا نحافظ على نقطه التميز دى ، والحقيقه طول ما اللى حواليك مش فاهمين شغلك 100% يبقى انت ماشى صح ، لو كل الناس بتفهم وبتعرف تعمل اللى انت بتعمله يبقى انت لا قيمه لك .
بعد كل ده لسه بتسال الشغل عالنت ليه مستقبل ولا لا ؟
- شغل على النت 2017
