عريس خالتى شعر لياسر عمار
مره جالنا عريس لخالتى.. كان محدش غيره جالها
جدى وافق قال “مبارك”.. قلنا بركه انه شالها
قضوا اول شهر ماشي.. واشتكت خالتى لجدى
بيعاملها كالمواشى.. كبرى دماغك وعدى
المهم انا جدى قالها.. بنتى مش هتسيب عيالها
بعد ما غضبت يومين.. جدى جرجرها وسحلها
جوزها رافض للعلام.. كان بخيل بردك بطبعه
كل حاجه يقول بكام.. بعدها يعد ف صوابعه
كان مراظى وكان ملاوع.. بس كان استاذ نفاق
كان مهاود كان مطاوع.. للى بيناصبوا العداء
كان بيشحت لجل ياكلوا.. بس كان دكتور شحاته
لما بيغير في شكله.. يبقى شكله عالبلاطه
المهم عياله كللوا.. الا واحد كان شمال
طلعوا خرجوا عليه ما خلها.. قال دا دول حبه عيال
قالوا لا يمكن يكون.. ده ابونا او قريبنا
رد واحد.. “قال يخون”.. قال ابونا ازاى يسيبنا
خالتى فجاه الوحى جالها.. قالت الحق المبين
لما مات جوزها ابن خالها.. قالت اتنيل بطين
اخدت البقف البخيل.. لجل ما تمشى الامور
بس كان نيله وعويل.. ارضه كانت ارض بور
لازم اطلق يا نيله .. هكذا خالتى استقالت
قام مريل جاب بليله .. مش مصدق ان قالت
طلقه والتانيه وتلاته .. بالتلاته طلاق سعيد
لما رفعت خالتى باتا.. جابت الحلم البعيد
بس حاجه غريبه خالص.. جالها واحد شبهه نسخه
كان بيحكم بالمجانص.. في الحقيقه .. جوازه وسخه
برده كان اصفر مضلل.. قالت اما نشوف طريقه
الحقيقه كان محلل.. ضله قال ولا ضل حيطه
خالتى قالت بكره هعلن.. عن مسابقه للاجاره
كل واحد جاى يسكن.. ييجى ومعاه البشاره
الحكايه تبان بجد.. رغم كون فيها بهاله
بعد جذب كتير وشد.. قلبت الليله اشتغاله
اللى جاى ايجار قديم.. نفسه يركب طول حياته
واللى متنيل لئيم.. واللى بيشكك في ذاته
واللى جاى سكران وطينه .. واللى بيجمع في حاله
واللى متشكل عجينه .. واللى جاى يسكن بماله
المهم انا جدى اجر.. للى كان مالهوش وجود
اللى عامل فيها عنتر.. والكلام من غير حدود
عقده كان مليان عيوب.. رغم ان عليه شهود
هو كام شهر ويا دوب.. باع وخان كل العهود
بعد ما وقع عقوده.. دار يوقع بين خلانى
البعيد قال من بروده.. المكان اصلا مكانى
لما قلنا ضرورى يمشى.. بس قولنا نشوف طريقه
فجاه كل البيت ما نمشى.. والمكان ولع حريقه
اللى قام يشمت ويفرح.. واللى قام يطفى بجاز
واللى قام يفتى ويشرح.. واللى خان حتى العزاز
واللى قام يلحقله دور.. واللى عامل فيها منقذ
واللى صابه دور غرور.. واللى قال يقسم وينجز
كل واحد فينا باع.. كل واحد باعله حاجه
الحقوق صبحت مشاع.. والحقيقه بقت ديباجه
الضمير موضه قديمه .. والمبادئ م الخيال
والنفاق والغش قيمه .. والوضوح بقى شيء محال
فجاه وقفت خالتى بايره .. واحنا بندلل عليها
رغم ان انا خالتى فايره .. والدهب مالى ايديها
والحكايه اعاده تانى
بكره هنقول الاعاده
مره جالنا عريس لخالتى.. كان محدش غيره جالها
جدى قال “مبروك” مبارك.. قلنا بركه انه شالها
جدى قال “مبروك” مبارك….. قلنا بركه انه شالها
