لفتره اللي فاتت بعتوا لنا مشاركات واسئله كتيره علشان تعرفوا ايه افضل انواع الماكياج اللي ممكن تستخدموها؛ ولاننا بنحاول دايما نحقق كل طلباتكم ونقدم لكم كل حاجه انتم محتاجين لها، هتكون حلقتنا النهارده عن افضل انواع الماكياج، وكمان هنعرف مع بعض ازاي ننظف البشره بعد الماكياج..
ودلوقتي تعالوا نبدا مع بعض بافضل ماركات وادوات الماكياج..
احمر الشفاه
اول حاجه بالنسبه للروج فيه ماركات كويسه للروج؛ زي ماركه ديور، ودي بيكون فيه منها ليب جلوس، وهو مش لامع اوي، وبيكون فيه الوان حلوه ، وبيدي شكل حلو اوي وهو مخصص اكتر للزفاف.
كمان من الماركات الكويسه للروج هي ماركه L’OREAL (لوريال)، وده بيكون مكون من جزاين؛ اول جزء بيكون مرطب وده بنحط منه قبل الروج علشان يرطب الشفايف وطبعا بيكون شفاف، والجزء التاني بيكون الروج، وده متوفر منه الوان كتيره زي ما احنا عايزين، والماركه دي من اكتر الماركات ثباتا بالنسبه للروج، ونقدر نحط منه في كل المناسبات، وده علشان ثباته العالي، كمان علشان سهل اننا نحطه في الشنطه من غير ما نخاف انه يتفتح مثلا؛ وده لانه محكم جدا ومش سهل الفتح.
كمان فيه ماركه Shiseido (شيسيدو)، وده بنلاقي منه الالوان الطبيعيه القريبه من لون الجسم زي البيج والروز والبينك، علشان الموضه السنه دي ان مظهرنا يكون صحي ووشنا رايق والوانه صحيه ومبهجه .
كمان من انواع الروج اللي انا شخصيا بافضلها هو الروج اللي بيكون في باليته زي ماركه Make up Forever ودي بتحتوي على 5 الوان، وميزتها انك تقدري تخلطي الالوان اللي انتي عايزاها بسهوله ، علشان توصلي لدرجه معينه .
الحواجب
رسمه الحواجب من اكتر الحاجات اللي بتسبب مشاكل لمعظم البنات؛ وده لانهم ممكن يستخدموا اقلام رسم الحواجب، وطبعا ده بيسبب تساقطها، وكمان بيكون شكلها مش طبيعي وبيدي سن اكبر للبنات.
ومن اكتر الماركات اللي بافضلها لبودره الحواجب هي بودره Body Shop، ودي بتكون متوفره بلونين، وبتكون مط مافيهاش اي لمعه ، ومعاها الفرشه المخصصه لرسم الحواجب.
اهم حاجه في رسم الحواجب هو اننا ما نرسمهاش من بدايتها وكمان مانرسمهاش بشكل جامد؛ لانها هتدي شكل مصطنع اوي وهتخلي الشكل مش مقبول.
كريم الاساس
من افضل الماركات لكريم الاساس هي ماركه ميبلين (Maybelline)، وهو سائل وده بانصح بيه البنات اللي مش بيكون عندها مشاكل حقيقيه في وشها ومحتاجه تداريها؛ لانه بيعمل تغطيه جيده للبشره وبيدي شكل طبيعي جدا ولون موحد للبشره ومابيعملش طبقات لون على الوش.
كمان فيه اشكال كتير من الفونديشين زي مثلا الفونديشين الموس (mousse foundation)، وده بيكون ملمسه ناعم مش جاف ولا سائل، وبيتوزع على الوش بسهوله ؛ لان تسييحه سهل، وشكله النهائي بيكون حلو اوي.
فيه كمان ماركه ديرما، وده انا باستخدمه كمان ككونسيلر تحت العين علشان يداري اي مشكلات موجوده زي الهالات او غيرها، باحط منه على الوش كله وكمان تحت العين، وبعدين باحط عليه بودره زي اي كريم اساس.
البودره
بعد ما نحط كريم الاساس مهما كانت ماركته لازم نحط بعده بودره علشان مايبقاش شكل وشنا دهني.
ومن افضل اشكال البودره هي البودره السايبه مش المضغوطه ، ومن الماركات الكويسه في البودره ماركه Mac(ماك)، وانا بافضل اننا نحط البودره بالفرشه مش الاسفنجه ونوزعه على وشنا بالكامل.
افضل طريقه بنختبر بيها البودره او كريم الاساس قبل ما نشتريه هي اننا نجربه على وشنا مش على ايدينا؛ لان دايما لون الايد مختلف عن لون الوش.
مزيل الماكياج
ماتستهونوش بمزيل الماكياج لانه مهم جدا، ومن افضل الانواع هي Maybelline؛ وده لانه هادي على البشره وكمان لو دخل جوه العين مش بيسبب اي مشكله ؛ لانه مخصص للعين والبشره ، وكمان مش بيعمل اي مشكلات او حساسيه للبشره .
بناخد من المزيل ده على قطنه ونمشي به على وشنا مرتين وبعدين ننشفه بقطنه ناشفه ، وبعدين نغسله في الاخر باي غسول، لكن لازم نحرص اننا نبعد تماما عن ازاله الماكياج بالغسول على طول.
التونر
من الحاجات المهمه قبل ما نحط الماكياج، اننا نرش وشنا بالتونر؛ وده علشان البشره ماتشربش الماكياج ويبقى تسييحه اسهل.
دلوقتي هنعرف ازاي نقدر نمسح الماكياج بمزيل الماكياج
هنستخدم مزيل الماكياج على قطنه ونمشي بها على الوش بهدوء من غير ما نضغط على البشره جامد، وكمان نمسح العين كويس والرموش باستخدام قطن الاذن.
