كيفية تركيب الرموش الصناعية المتفرقة

– تركيب الرموش الكامله :

الادوات اللي نحتاجها:

1- رموش كامله من اي ماركه .

2- صمغ خاص بالرموش الصناعيه ، يفضل ماركه ( دوو ) موجوده في اغلب محلات المكياج.

3- ملقط.

4- مقص اذا احتجنا نقص الرموش ونعدل مقاسها.

***

يلا نبدا :)

خذي الملقط واسحبي طرف الرموش بشويش ..

ناخذ الرموش الصناعيه ونحطها على الرموش الطبيعيه عشان نشوف اذا طولها مناسب (بالصوره الرموش اطول من العين) ..

 في هالحال ناخذ الرموش ونقص شوي، حطي في بالك الرموش لازم تكون بطول فتحه  العين ..

بالعاده الرموش الصناعيه طولها متدرج قصير من الطرف الداخلي للعين ويطول لحد يوصل للطرف الخارجي، عشان كذا ضروري القص يكون من الجهه الطويله اي الطرف الخارجي، لاننا نبغى نحافظ على تدرج الرموش الطبيعي ..

***

يفضل لو تحطين طبقه خفيفه من المسكرا لان الرموش الصناعيه بيكون سوادها واضح واذا حطيتي الرموش على طول ماراح تندمج بشكل طبيعي مع رموشك، بعد المسكرا استني دقيقتين لحد ما تنشف عشان ما تتلطخين ..

***

فيه طرق مختلفه لوضع الصمغ على الرموش:

تقدرين تستعيني بعود قطن او عود اسنان, او تستخدمي الصمغ مباشره من العلبه , شوفي الطريقه اللي تريحك ..

(( انتبهي ))

اهم خطوه وهي السبب الرئيسي في تركيب الرموش بشكل صحيح هي انك تنتظرين الصمغ يجف شوي, يعني تقريبا من ثلاثين لاربعين ثانيه قبل تركبينها، لا تخافين كل ما طولتي كل ما كان اسهل تركيبها ..

بهالوقت انصحك بانك تثنين الرموش عشان تلين و تاخذ شكل العين بشكل افضل ..

***

جلسي الرموش الصناعيه على رموشك بعدين خذي الملقط وثبتيها على رموشك الطبيعيه ..

باستخدام الملقط او باصبعك اضغطي الرموش الصناعيه مع الطبيعيه عشان تدمجينهم مع بعض ..

بعد ما ثبتنا الرموش نعيد على الايلاينر عشان نزيد سواد الرموش ونخفي الصمغ, تقدرين تحطين طبقه ثانيه من المسكرا كخطوه اخيره ..

***

كيف اشيل الرموش الكامله ؟

احرصي ان قبل تمسحين المكياج تشيلين الرموش الصناعيه ، جيبي قطنه فيها مزيل مكياج وخليها شوي على الرموش عشان تفكك الصمغ بعدين بعنايه اسحبي الرموش من الطرف الخارجي، اذا حسيتي الصمغ ماسك ارجعي عليه بالمزيل (يفضل يكون مزيل مكياج زيتي).

هل كثره استخدام الرموش الصناعيه مضر للرموش الطبيعيه ؟

لا.. يعتمد على جوده الصمغ وطريقه سحبك للرموش بعد استخدامها, لو كنتي عنيفه رح تشيلين من رموشك الطبيعيه مع الصناعيه , عشان كذا لازم تنتبهين بان يدك تكون خفيفه وناعمه مع الرموش.

هل اقدر ارجع استخدم الرموش مره ثانيه ؟

هذا الشيء يعتمد عليك، وعلى هل استخدمتي عليها مسكرا او لا, تقدرين تاخذين الرموش وتنظفينها من الصمغ القديم باستخدام مزيل المكياج, استخدامها لحد اربع او خمس مرات، لكن في حال كان عليها مسكرا مده صلاحيتها بتكون اقل.

*

*

2- تركيب الرموش المتفرقه :

اول شيء حطي مسكرا على رموشك الطبيعيه واتركيها تجف ..

***

حطي كميه بسيطه من الصمغ على يدك او على سطح املس, خذي كم حبه وحطي طرفها بالصمغ, شيلي بالملقط و ثبتيها بين الرموش الطبيعيه قدر المستطاع ..

حطي الثانيه وخلي بينها وبين اللي قبلها فراغ بسيط، بهالشكل يطلع شكلها طبيعي وغير متكلف, اضغطي عليها باصبعك عشان تلصق زين ..

***

ندمج الرموش الصناعيه بالطبيعيه بالمسكرا, لكن بشويش عشان ما تطلع من مكانها..

تقريبا من سته الا عشر حبات تكفي، وهذا يعتمد على اللوك اللي تبينه، كل ما خففتي الكميه كل ماصار طبيعي اكثر ..

***

كيف اشيل الرموش المتفرقه ؟

نفس طريقه الرموش الكامله وهي تحطين قطنه عليها مزيل مكياج عشان يتفكك الصمغ، بعدين بانتباه شديد اسحبي كل رمشه صناعيه .

هل اقدر ارجع استخدم الرموش المتفرقه ؟

يفضل لا, ماتسوى عليك تنظفين كل حبه ههههههههه.

*

*

وبس :