ما هي اشعه الصبغه
تعتبر اشعه الصبغه من الفحوصات المهمه اللى بتبين سبب تاخر الحمل
عاوزين نتابع مع بعض خطوه بخطوه من اول لما الدكتور بيطلب منك الاشعه لحد لما تروحى مركز الاشعه و تعمليها من غير لا خوف و لا قلق .
اول حاجه عاوزين نعرف ايه اهميه اشعه الصبغه اللى هتعمليها دى بالنسبه للدكتور يعنى بمعنى تانى ليه الدكتور طلبها منك ياترى هتبين ايه
اولا بتبين مدى سلامه الرحم و خلوه من الالتصاقات لان الالتصاقات دى بتاثر بالسلب على عمل قنوات فالوب .
ثانيا بتوضح هل الرحم فيه اورام او الياف .
ثالثا بتعرفنا هل الرحم فيه عيوب و لا سليم و كمان بتوضح شكله لو كان غير طبيعى يعنى لو رحم ذو القرنين او الرحم المنقلب او الرحم المنقسم بحاجز .
رابعا بتوضح هل فيه انسداد فى قناتى فالوب و لا مفيش .
خامسا بتبين فين مكان الانسداد بالظبط .
سادسا و اخيرا الاشعه دى مش بس لها دور تشخيصى لا دى كمان لها دور علاجى مهم اوى سمعاكى ياللى بتسالى ازاى ؟؟؟
هقولك لان مرور الصبغه خلال الانابيب بيفتح الانابيب لو كان فيها انسداد .
لحد كدا فهمنا احنا هنعمل الاشعه دى علشان نبين ايه و هنستفاد منها فى ايه طاب خلاص اقتنعنا اننا هنعملها علشان مهمه و مش هنخاف و لا هنقلق طاب تيجى نحدد المعاد اللى هنعمل فيه الاشعه .
- الاشعة بالصبغة للرحم
