وصفه قلب اللوز الجزائريه
المقادير :
-1/ للعجينه :
– 1 كلغ سميد حرش
– 500 غ سكر مغربل
– 200 غ زبده ذائبه او سمن و تكون بارده شويه اي دافئه ( انا استعملت السمن)
-1/2 كاس ماء زهر
– تقريبا كاس ماء بارد
– رشه قرفه بودره
للشاربات :
-500 غ سكر عادي
– 1 ل ماء
– فنجان ماء زهر
الحشو :
-3 كيسان كاوكاو مطحون او لوز
التحضير :
– اول خطوه لازم نحضر الشاربات ندي كسرونه ندير فيها سكر + ماء و نوضعها فوق نار متوسطه و نحرك شويه باش سكر يذوب و مايلسقش
– من بعد كي نشوف بلي سيرو بدا يغلي نحسب 15 د من بدايه الغليان و نطفي عليه و نخليه في مكان عادي حتى يبرد شويه اي يدفا
– من بعد نضيف ليه فنجان نتاع الماء زهر و نخليه على جنب
– ثاني خطوه نروح لتحضير العجينه ندي قصعه متوسطه ندير فيها سميد + سكر و نخلط الكل مده 5 دقائق باش سكر يدخل في سميد و مايوليش يبان
– من بعد 5 د نبدا نضيف في زبده ولا سمن بالتدريج و نخلط مانعجنش كي شغل رانا نحضرو في كسكس و نخلط مده 5 الى 10د باش ينسجم الخليط مليح
– نخليها ترتاح مده 20 دقيقه
– بعد هذه المده نرشها بالماء الزهر بالشويه حتى تتخلط العجينه
– نبيتها ليله كامله اونخليها في الثلاجه مده ساعه كامله طبعا نغطي العجينه
– في اليوم الموالي نخلط العجينه بيدينا نلقاوها نشفت شويه من سطح نخلطها و نذكر دايما لازم مانعجنش لازم العجينه تكون مثل الرمل اي مثل الكسكس
– نرشها بالماء البارد حتى تصبح العجينه طريه ( مانكثرش الماء حتى تتعجن رش الماء يكون بالتدريج و نتحسس من العجينه )
– نضيف القرفه الى الخليط و نخلط ¼ مغرف قهوه
– ندي سنيوه قطرها 36 الى 40 سم تكون مدهونه مليح بالزبده و نقسم الخليط الى 2 نفرغ الاول مانضغطش عليه ندير الكاوكاو او اللوز و نزيد نضيف الخليط 2 بلا مانضغط على العجينه
– ناخذ سكين نقطع العجينه على الطول و لكن على العرض نرسم المربعات مانقطعهاش
– نزين بحبات لوز او الكاوكاو و نتركها ترتاح مده 10 د قبل ماندخلها الفرن
– الفرن يكون سخن 20 د من قبل ندخل القلب اللوز على نار هادئه بلا ماندهن السطح
– كي نشوف بلي بدا ياخذ اللون الوردي مع الجوانب الصينيه نخرجوه من الفرن و مباشره ندهن وجهه بالسمن او زبده ذائبه
– نعاود ندخلوه للفرن و نخليه يكسب اللون ذهبي
– كي يجهز نطفي الفرن و نخرجومن بعد مباشره نسقيه بالشاربات اللي كنت حضرتها من قبل لكن مانسقيهاش كلها نخلي كاس منها
– نعاود ندخلو الفرن يكون مطفي و نخليه يشرب السيرو ديالو مده 10 د من بعد نعاود نخرجو ونسقيه بالكميه متبقيه و نعاود نخليه في الفرن مده 10د
photos-0008.jpg
photos-0009.jpg
– بعد هذه المده نخرجوه من الفرن و نخليه في مكان عادي
– يقدم مع الشاي
- سميد قلب اللوز
