مذكرات زوج ضعيف الشخصيه (تموت من الضحك) اول جزء
؛؛مذكرات زوج ضعيف الشخصيه
اسمي عبده …….زوج مثالي لهذه الايام
انا طبعا مش ضعيف الشخصيه …. بس مش بحب المعارك والكلام دا كله
وبصراحه مراتي يعني لما بشوفها مش عارف ليه بفتكر مصارعي السومو
وانا راجل غلبان
ضربه بس من كوعها ممكن تحصل لي حاجه
زي قضاء شهر راحه في العنايه المركزه
المهم
انا بصراحه قلت اكتب مذكراتي عشان الناس تستفيد منها
ملحوظه المذكرات في خزنه في الدولاب المغلق بمفتاح وحاطط فوق الخزنه حبه هدوم عشان محدش يشوفها
هو مش خوف
بس احتياط
العمر مش بعزقه
*********************
يوم عادي
صحيت من النوم وطبعا مراتي صحيت قبلي وحضرت الفطار على مضض ….. زى كل يوم
بس النهارده قالت لي واحنا بنفطر
..(عبده).. انا عاوزاك تنزل بعد كده تجيب الحاجات من تحت …. اصلي زهقت
فوجئت باللي قالته بس عادي
مراتي اصلا متقلبه ولو قالت لي تعال نسيب مصر مش هفاجا
ابتسمت لها وقلت
تحت امرك يا حياتي
نظرت لي شذرا …. كان نفسها اقول لا او اجادل عشان تستغل الفرصه دي في انها تعمل تصبيحه نكد
بس على مين
مسكت الجرنال وتظاهرت باني اقرا الجرنال ودفنت فيه وجهي
وقلت لها
تصدقي يا حبيبتي قريت امبارح في الجرنال … ان الانسان لازم يمشي ويمشي رجله لان المشي له فوائد كبيره على الجسم …. وبيخلي الدم يمشي في العروق …. ويزيد نضره وجمال الوجه
سكت شويه
حسيت بمراتي بتفكر
طبعا انا لعبت في نقطه ضعفها
جمالها
قالت:يعني المشي بيزيد في جمال الوجه …. غريبه اوي اول مره اسمع كده …. طيب بقولك ايه … خلاص متنزلش تجيب حاجه انا هبقى انزل اجيبها عشان امشي رجلي
حاولت ادفن ضحكتي …. فكحيت حتى اخفي الضحكه …. وقلت
تحت امرك يا حياتي
ثم قمت وقلت لها
عاوزه حاجه يا حبيبتي
فكرت قليلا ثم اشارت بيدها كالملوك الذين يعفون عن العبيد
لا مش عاوزه مع السلامه
****************************
النهارده معزوم عند والدتي
والدتي الطيبه عازماني انا ومراتي واخواتي البنات عندها
ربنا يكرمها الست دي والله
دخلت البس ولقيت مراتي قاعده قدام التليفزيون فقلت لها
ايه يا حياتي انت مش هتلبسي ولا ايه عشان العزومه
قالت في لا مبالاه
لا مش رايحه
اتعصبت وحاولت امسك نفسي
ليه حبيبتي احنا متفقين اننا نروح من يومين
فضلت تتفرج على التليفزيون ولا كانها حاسه اني متنرفز
وايه يعني …. مالياش مزاج
مسكت نفسي وقعدت على الكرسي ابص لها
اعمل معها ايه الست دي
حاولت اكلمها بالمنطق قلت
طيب في حاجه انت زعلانه منها
قالت
لا بس بصراحه انا مش بحب قعده حماتي واخواتك .. فمش هروح حصل ايه يعنى
رديت عليها
بس هما بيحبوك … وعمرهم ما قالو حاجه وحشه لك
لقيتها بصيت لي بصه اللي خلاص اتخنق واللي لو كترت معه في الكلام يبقى انت خلاص لعبت في عداد عمرك
قالت
انا قلت خلاص … مش رايحه … فيه حاجه
بلعت ريقي من النظره الناريه بتاعتها وقلت لها
لا طبعا يا حياتي …. انت اعملي اللي يريحك … انا هاروح انا
الحمد لله انها سمحت اني اروح انا ومعملتش حصار علي وكانت ممكن تاخدني رهينه وتتفاوض مع امي علي ….. طيبه اوي مراتي
وقبل ما ادخل الغرفه عشان البس
فكرت وتوقفت
قلت لها
طبعا براحتك يا حبيبتي …. بس انا كنت عاوز اخدك معي النهارده اصلهم كانوا عاوزين يتاكدوا من شائعه طلعت عليك
نظرت لي وسابت التليفزيون
شائعه ايه
قالت لي
لا متخديش في بالك … مش عارف مين اللي طلع عليك انك تخنت وبقيت مبتعرفيش تتحركي من مكانك .. فكنت عاوز اثبت لهم انك لسه رشيقه وكويسه لقيتها قامت وبصيت لي وقربت مني
استر يا رب
دا انا غلبان
قالت في غضب
انا تخنت
تراجعت الى الخلف وبصيت ورا للشباك
هو فكره اني انط من الشباك مش فكره وحشه
صحيح انا ساكن في الدور العاشر
بس دا احسن من اللي هتعمله في
قلت لها
لا طبعا يا حياتي دي شائعه طبعا … انا هاروح اكذبها
قالت بصوت عال
لا …. استنا انا هلبس وهاروح معك
ودخلت تغير هدومها
الحمد لله متهورتش
مش قلت لكم
يوم زياره لابن عم زوجتي
طبعا انا مش باطيق ابن عم زوجتي ده خالص لانه كان هيخطبها قبلي وهي عارفه كده كويس
هاحكي لكم تفاصيل المعركه …. لا قصدي الملحمه …. لا لا الموقف
صحيت مراتي الصبح وبعد ما اعدت طعام الفطار على مضض … الحمد لله انها بتعمله من غير yصابات لي
قالت واحنا بفطر
عبده النهارده احنا رايحين عند ابن عمي هو عازمنا
فوجئت بالعزومه
ليه هو فيه ايه …. عيد ولا حاجه
نظرت لي النظره الناريه المعرفه بتاعتها فنزلت في الكرسي بتاعي وانا بدعي ان اليوم يعدي على خير
قالت
هو لازم يكون فيه حاجه …. حضر انت بس نفسك وخلاص
قرار عسكري صارم
حاولت اخفي وجهي في الجرنال وقلت
بس انا مش بحب …. قصدي مش بارتاح مع ابن عمك ده …. انت فاهمه انه غريمي في حبك يا حياتي
طبعا دا كان بيرضي غرورها قالت
دا كان من زمان وانتهينا خلاص ….. واتزفت واختارتك
قلت في نفسي
ليه بس اختارتيني … مكنش عندي عقل ساعتها … محدش كان ضربني بالنار في اليوم ده ولا كانت عربيه شالتني
قلت لها
طبعا يا حياتي دا سوء حظ لي اني … اني…
اتسعت عيناها الي وانتظرت بقيه الجمله
ايه دا يا ربي هو انا متجوز مخبر ولا ضابط جستابو ليه النظره دي
دا سوء حظ اني ضيعت اول حياتي وانا مش معاك
الحمد لله لحقت نفسي
ضربت بيدها المائده وقالت
انتهى النقاش … بعد ما تيجي من الشغل هنروح
شوفتوا زوجتي قد ايه ديموقراطيه
الحمد لله
كان فيه نقاش
دا تطور
طبعا لو مكنتش وافقت كنت ……
مش هقولكم ايه بيحصل
بس ان شاء الله لو فيه نقاش تاني من ده
هبقى اخبي كل المقشات من الشقه
اصلها بتوجع اوي
عاوزين تعرفوا ايه حصل في العزومه
لا دي قصه تانيه هاكملها المره الجايه
ان محصليش حاجه وحشه لي
ولو حصل
هاكملها لكم من غرفه ( الانعاش )
