كريب محشي جمبري والبشاميل
مقادير عجينه الكريب:
* 1⁄2 كوب دقيق (طحين)
* 1⁄4 كوب زبده سايحه
* ملعقه صغيره زبده
* 2 حبه بيض
* 2 كوب لبن
* رشه ملح
مقادير الحشو:
1⁄4 كيلو جمبري مسلوق
1⁄2 ثمره فلفل مقطعه شرائح (اي لون تحبيه)
بصله متوسطه مقطعه شرائح
2 ملعقه كبيره عصير ليمون
1⁄2 كوب زيتون مقطع شرائح
2 ملعقه كبيره بقدونس مفروم
2 ملعقه كبيره زبده
2 فص ثوم مفروم
ملح وفلفل
مقادير صوص البشاميل:
1⁄2 كيلو لبن
ملح وفلفل ابيض
فص ثوم مفروم
2 ملعقه كبيره زبده
2 ملعقه كبيره دقيق
جبنه رومي او شيدر
الطريقه :
1- لتحضير الكريب؛ اخلطي الدقيق والملح والسكر مع بعض، وبعد كده صبي عليهم اللبن والبيض والزبده ، وقلبيهم كويس مع بعض بايدك او باستخدام الخلاط الكهربائي، وهتلاقي ان العجينه سائله شويه ، وبعد كده سيبيها شويه علشان ترتاح قبل ما تستخدميها.
2- هاتي طاسه تيفال، وادهنيها بكميه صغيره جدا من الزبده ، وبعد كده صبي فيها كميه مناسبه من عجينه الكريب، وسيبيها شويه على نار هاديه علشان تستوي، وبعد كده اقلبيها على الوش التاني لحد لونها ما يبقى دهبي فاتح، وبعد كده ارفعيها في طبق وسيبيها تبرد، وكرري نفس الخطوه اكتر من مره لغايه ما كميه العجينه اللي عندك تخلص.
3- لتحضير الحشو؛ دوبي الزبده في حله ، وشوحي فيها البصل والثوم لحد ما يدبلوا ولونهم يبقى اصفر، وبعد كده ضيفي عليهم الجمبري المسلوق وقلبيهم مع بعض، وفي الاخر ضيفي البقدونس والفلفل الملون والزيتون والملح والفلفل وعصير الليمون.
4- لتحضير البشاميل؛ دوبي الزبده على النار، وضيفي معاها الدقيق وقلبيه مع الزبده شويه على النار لغايه ما يبقى لونه دهبي، وبعد كده ضيفي اللبن، مع الاستمرار في التقليب علشان الخليط ما يكلكعش، ولما الخليط يوصل للسمك اللي انتي عايزاه تبليه بالملح والفلفل وبعد كده ارفعي الخليط من على النار، وضيفي عليه البقدونس والجبنه .
5- بعد كده احشي كل قطعه كريب بملعقه كبيره من حشو الجمبري، ولفيه وحطيه في صينيه مدهونه زبده ، وبعد كده وزعي البشاميل على وش الكريب، وفي الاخر حطي شويه جبنه ، ودخلي الصينيه في فرن ساخن، وسيبيها لمده 15 : 20 دقيقه ، وبعد كده طلعيها، وقدمي الكريب وهو سخن.. وبالهنا والشفا.
