مقادير العجينه :
3 اكواب دقيق ابيض (دقيق حلويات يا قمرات)
ملعقه صغيره ملح
معلقه ونص متوسطه الحجم خميره فوريه او لو مفيش خميره فوريه اعملى بالخميره العاديه معلقتين علشان الجو برد وهنحتاج تتخمر العجينه اسرع شويه .. ولو استخدمتى الخميره العاديه تاخديها كدا فى كوبايه صغيره وتدوبيها فى شويه سكر ومعلقه ميه علشان تبقى مجهزها للاستخدام يعنى
ملعقه اكل سكر
4 معالق اكل حليب بودره (انا بستخدم لبن نيدو)
فنجان زيت
كوب ماء دافىء (علشان يرفع العجينه بسرعه وتخمر فى اسرع وقت لان احنا فى الشتاء)
الحشوه :
كوب صلصه ثقيله متسبكه على النار (بصل يقلى في شويه زيت ثم تضاف اربع طماطم مخلوطه في الخلاط مع ملعقه كبيره معجون الطماطم(صلصه طماطم جاهزه) و4 ثوم الى البصل، بعد ان يقلى، وتتسبك جيدا )
2/1 كوب شرائح زيتون (سواء زيتون اخضر او اسود زى ماتحبى)
2/1 كوب فلفل رومي
كوب جبنه مبشوره (انا بعمل جبنه رومى ولو متوفر عندك جبنه موزريلا يبقى حلو اوى)
نيجى بقى للطريقه يا حلوين ابتسامه
الطريقه :
تنخل المكونات الجافه معا (يعنى الدقيق مع لبن نيدو مع الملح والسكر) ودا علشان الهواء يتخللها ومتبقاش العجينه مكتومه يعنى وتنفش معاكى
يضاف الماء والزيت والخميره ويعجن جيدا حتى تتكون عجينه متماسكه
وافضلى اعجنى فيها حوالى 10 دقايق كدا لان العجن الكويس للعجينه دا السبب الاساسى ان عجينتك تكون ناجحه وكويسه اوى
غطيها بقى بكيس بلاستيك على وش العجينه كدا وحطيها فى مكان دافىء علشان تخمر بسرعه
انا بغطيها بكيس بلاستيك من وشها وبلف الوعاء اللى عجنت فيه فى البطانيه وسيبيها كدا حوالى ساعتين ونص
وبعد طبعا السعاتين ونص دول هتكون الخميره حجمها اتضاعف وكبرت
انا المقدار دا بيعمل معايا صينيه كبيره وصينيه متوسطه قولى صينيه ونص كدا
بعدين تجيبى الصينيه وتفردى فيها العجينه بس تكونى داهنه الصينيه بزيت ذره علشان تطلع بسهوله معاكى لما تستوى
بعد كدا تجيبى الصلصه بتاعتها اللى انتى حضرتيها وتبداى تدهنى وش العجينه بعد ما فردتيها ف الصينيه
بعدين ترشى الجبنه الرومى على الصلصه وبعدين تحطى حلقات الفلفل الرومى والزيتون وترصيه بشكل حلو كدا وبعدين يا ستى دخليها الفرن ……
هيا بالظبط بتاخد تلت ساعه بالظبط ومش بتزيد عن 25 دقيقه
المهم بعد مرور 15 دقيقه افتحى الفرن وبصى عليها وتابعيها برضه
وبالهنا والشفا
