كيفية تحضير البسطيلة بالكفتة و الخضر
المقادير كما فالمطبخ المغربى :
رابعة الكفتة
جزرتين محكوكين
كرعة خضراء محكوكة
بصلتين مشلطين رقيق
ثلاث فلافل 2 حمراء و وحدة خضراء مقطعين رقيق
بكية فيرمسيل مرطبة فالماء مغلى و مقطعة
شوية الزيتون اخضر دوائر
شوية الحامض مرقد طريفات رقيقة
شوية الفرماج محكوك
شوية الملح، شوية الكمون، شوية الابزار، شوية القزبر مقطع رقيق
ربع كوب زيت، كنورة دجاج مفرتة ، شوية الزبدة لدهن الورقة .
كيفية التحضير :
كنوجد الخضر و نبدا فالتحضير :
اولا ناخذ مقلاة تحط علي النار بها شوية الزيت و نشحر البصلة
والفلافل و نزيد شوية الملح و الابزار و نشحرهم مزيان حتي يذبالوا عاد
نزيد الجزر و الكرعة و نشحر الكل حتي يهبط الخليط و نضيف عليه
الكفتة و العطرية و كنور مفرتت و نحرك الكل
من بعد نزيد علي الخليط بعدما نزول المقلة من علي النار،
الحامض و الزيتون
ثم نخلط الخليط و نضيف لية الشعرية الصينية ، و نوجد الورقة و الزبد
ونبدا فتعمار الورقة
بعدما حطينا الخليط فوق الورقة ديالنا بالعادة تنفرش فوق الصينية
اللى غادى تدخل للفرن ثلاث و رقات، و وسطهم تنحط الحشوة
وفوق الحشوة تنحط الفرماج محكوك
وتنرد الورقات و تنحط من فوق و رقة و الحواشى تيدخلوا تحت، مع
الدهن دائما بالزبدة مذوبة بين الورقات
تدهن من فوق بالزبدة و تدخل للفرن تطهي غير تحمر فقط، و قبل
التحمار النهائى تظهر ترش عليها الفرماج محكوك و ترجع
شوية للفرن دون ميقساح الفرماج و تقدم ساخنة
