المقادير
1/2 مثل مكرونة صغيره
1/2 مثل ارز مصرى
1/4 مثل شعريه
1/4 مثل عدس بجبه
1/4 مثل حمص الشام
3/4 كيلو طماطم
2 بصلة كبيره
راس ثوم كبار مفرومه
معلقة زيت
خل / ملح / كمون / ليمونه
الطريقه
اول حاجة بعملها بنقع الحمص من قبلها بيوم عشان تسويتة تبقي سهله
بعد كدة بحطة عالنار و لما المية تغلي و هيدخل فالسوي بحط 1/2 كوباية عصير طماطم و ملعقة ثوم مفروم و ملح و كمون و ليمونة عشان يطلع زي حمص الشام بتاع بره
تاني حاجة المكرونه
هنسلق المكرونة فمية مغلية و نضيفلها ملعقة ملح كبار خلال السليق
بعدين هنصفيها و نغسلها غسلة بسيطة و نحط عليها ملعقة زيت صغار و نقلبها كويس و نسيبها
زي كده
نيجي للرز
هنغسل الرز كويس و نحمر الشعرية و عليها الرز لحد ما يسخنو كويس اوي بعدين نضيف الملح و المية المغلية و نسيبة يغلي لحد ما يتشرب
بعدين نوطي النار علية و نسيبة يستوي براحته
علي فكرة انا بعمل رز الكشري بزيت العباد او زيت الذرة عشان يلمع و يبقي خفيف
العدس
هنغسل العدس كويس و عالنار هنحطة يتسلق و زي الحمص هنحطلة ملح و كمون
اول ما يستوي بصفية من المية بتاعتة عشان لو فضل بها بيتهري و بيستوي زياده
البصل او التقليه
هنقط بصلتين كباااااااار شرايح رفيعة و لو عندك ما كينة الشيبسي يبقي تمام اوي و لو معندكيش قطعية بسكينة حامية علي لوح التقطيع
هنحمرة فزيت غزير لحد ما توصلي للون اللي بتحبيه
بعد كدة خدي بالك عشان يطلع مقرمش و مش شارب زيت
هنصفية كويس جداااااا من الزيت بتاعة و نحط تحتة حاجة تشرب اي بواقي للزيت (مندايل المطبخ او و رقة بيضا) و لما يبرد حطي علية برضة رشة بسيطة ملح و كمون و شيلية من الورقة او المنديل فطبق تاني نضيف
واخيرا الصلصه
هنضرب الطماطم فالخلاط بعد ما غسلناها كويس و عالنار الحلة بها زيت عباد او ذرة و نحمر بها الثوم و لما يصفر لونة هنضيفلة الخل و يغلي بسيط بعدين هنحط الطماطم و ملعقة كبار صلصة (ممكن الاستغناء عنها) لحد ما تتسبك
بعدين هنغرف و تاكلي احلي كشري و احلي من بتاع برة و اضمن فنضافتة كمان