طريقة عمل شوربة المشروم
المقادير:بصلة مقطعة قطعا صغار .
3 معالق دقيق.
3 معالق زبدة .
ربع كيلو مشروم.
كوب كريمة .
ملح و فلفل.
5 كاسات شوربة فراخ.
اوراق بقدونس للتزيين.
الكيفية :
دى مفيش اسهل منها اول حاجة هاعملها هاقطع المشروم..
هاجيب حلة و احط بها شوية زبدة و اشوح بها المشروم مدة عشرة دقيقة و بالتاكيد هاضيف علية الملح و الفلفل.
بعد كدة هاخد حوالى كاس و احد من الشوربة و احطها علي المشروم و اخلية علي النار مدة عشرة دقيقة علشان يستوى و بعد كدة هاطفى البوتجاز و اسيب المشروم لغاية ما يبرد.. و بعد ما يبرد هاضربة فالخلاط.
هاحط شوية زبدة فطاسة و هاضيف ليها البصل و اشوح البصل علي النار مدة ربع ساعة .
بعد كدة هاضيف ليها الدقيق مع التقليب المستمر لغاية لون الدقيق يبقي ذهبى و بعد كدة هاحط كاس شوربة بالتدريج مع التقليب المستمر علشان الدقيق ما يكلكعش و بعد كدة هاضيف ملح و فلفل.
هاجيب المشروم اللى ضربتة فالخلاط و احطة فحلة علي النار و هاضيف الية كاس الكريمة و اسيبهم يغلوا كلهم مع بعض… و بعد كدة هاحط باقى الشوربة .
هاجيب طبق الشوربة و احط فية الشوربة .
دة الشكل النهائى لطبق الشوربة و علي فكرة يمكن انك تزينى الطبق ببعض اوراق البقدونس…
وبالهنا و الشفا