التردد في اتخاذ القرار
كثير من الناس بتواجهم مشكله خطيره جدا .. وهى التردد فى اتخاذ القرار ..والمصيبه اكبر لو كانت متعلقه بمساله مصيريه فى حياته بيكون محتار جداااا ومش عارف يعمل ايه ..؟ ونفسه تنزل معجزه من السماء تعرفه ايه الصح من الغلط …؟ ويختار ايه ويبعد عن ايه ..؟ طيب ايه الحل ..؟؟الحل انك تشترى حقيبه انت قدها .. وتلبسها وتاخدها معاك .. ولما تواجهك مشكله او تكون محتار بين امرين .. تفتحها بسرعه وتخرج محتواياتها وتبدا تنفذ اللى مكتوب فيها وانت بتقول لنفسك انا قدها ان شاء الله دى طريقه جديده الفتها بفضل الله علشان تساعدنا فى اتخاذ قرارات بايجابيه ومن غير خوف ..حاول تتعلمها كويس جدااا وعلمها لكل اصحابك وان شاء الله مش هاتتحتاج لاى مخلوق يساعدك فى قراراتك …
بالتوفيق يارب للجميع ..
حقيبه ..( انت قدها ) للتخلص من التردد
_________________________________هابدا بسؤال الاول ..؟
هو ازاى اقدر اخد قرار فى حياتى ..؟ او ايه المقياس اللى بنعتمد عليه فى اتخاذنا لقرارتنا …؟ وياترى التردد ده يعتبر مرض مثلا ولا هو امر طبيعى ..؟
التردد امر طبيعى جدااا بس بتختلف درجته من انسان للتانى ..
النوع الاول : التردد عنده بيكون فى كل حاجه فى حياته الصغيره قبل الكبيره ودول مشكلتهم انهم بيستسلموا كتير جداا للوسواس الداخلى عندهم .. وللاسف مش بيحققوا حاجه فى حياتهم ومابيعرفوش يستمتعوا بنتائج قرارتهم لانهم بيفضلوا عايشين فى نفس درجه القلق والخوف حتى بعد اختيارهم لقرار او طريق معين .. والنوعيه دى من الناس غالبا بيتحول الموضوع معاهم لمرض نفسى ومحتاجين متابعه ..وبيقل ثقتهم فى نفسهم جداااااااا …
علشان كده النوع ده من الناس محتاج مقاومه وعزيمه وتدريب مستمر علشان يقدر يتخلص من الوسواس اللى جواه .. وده هايكون عن طريق استخدام الحقيبه اللى هاقولها دلوقتى بس بشكل فعال ومستمر لحد ما يتخلص تماما من فكره التردد ..
النوع الثانى : التردد عنده بيكون فى امور مصيريه فقط ..زى مثلا اختيار شريك الحياه او اختيار كليه معينه او اختيار مشروع معين .. فالتردد فى الحاله دى بيكون شى ايجابى جدااا لانه هايتبنى عليه قرارات تانيه مهمه فى حياتنا ..فلازم نختار بدقه وبمهاره عاليه
ودى يخلينى اجاوبك على السؤال التانى .. وهو ازاى اقدر اخد قرار فى حياتى ..؟
__________________________
بمنتهى البساطه انا ربنا خلقنى وانا صغير وعقلى كل مرحله عمريه بعدى عليها … بكتسب مهارات معينه فببتخزن جوايا على شكل ملفات معينه بتساعدنى على تكون افكار وقيم ومعتقدات ..واللى منها بقدر اخد قرار وبحدد انا عاوز ايه فالبيئه اللى اتربيت فيها والطريقه اللى اتربيت عليها بتلعب دور مهم جداااا فى قدرتى على اتخاذ قرارتى وتحديد انا عاوز ايه …
وعلشان اقدر اخد قرارى بثقه زى كثير جداا من الناس يبقى نفتح الجيب الخارجى للحقيبه ..ونخرج منه اربعه (4) معاير هامه اطبق كل معيار منهم على حده ..واللى هايقدر يساعدنى فى اتخاذ القرار اكمل عليه بكل ثقه وشجاعه تعالى اشرحلك كل معيار منهم بالتفصيل ونشوف نستغلهم ازاى
1- الخبره
______
يعنى انا مريت بمشكله زى دى قبل كده وعارفت ايه السلبيات والايجابيات ..وبناء علي خبرتى ومعرفتى هاخد قرارى بمنتهى السهوله .. وعلشان كده ديما بقول جربوا كل حاجه وخلوا عندكم مهارات التعلم من التجارب وتحليلها علشان نكون عندنا خبرات تساعدنا فى تحقيق احلامنا وفى الوصول للنجاح
فده المعيار الاول اللى بعتمد عليه فى اتخاذ قرارى ..انى يكون عندى خبره … طيب لو ماكانش عندى خبره وماجربتش الموضوع ده قبل كده .يكون ايه الحل ..؟ يبقى اجرب المعيار التانى اللى يساعدنى فى اتخاذ القرار
2- المشاهده :
____________
يعنى اشوف حد غيرى انا بثق فى كلامه وافكاره ..واستفيد من تجربته فى نفس المشكله اللى عندى .. واحاول اسمع منه السلبيات والايجابيات وايه النصائح اللى ممكن يوجهها ليك .. وبعدين احاول اقلده فى الحاجه اللى هاتفدنى وتريحنى ..والتقليد مش وحش زى ماناس كتير بتتخيل ..بالعكس ده بيساعدنا على اكتساب خبرات ومهارات ويعلمنا تجارب السابقين وبيخلينا نكون حذرين فى الوقوع فى الاخطاء اللى وقع فها غيرنا ..
طيب لو ماعرفناش نستخدم المعيار ده كمان ..وماعرفناش نلاقى حد نستفيد من خبرته .. او لافينا اقوال متناقضه ونصايح مختلفه وواقعين فى حيره .نعمل ايه ..؟يبقى نفكر فى المعيار الثالث والرابع ..
3- التجربه والخطا
.______________
لازم هاتجرب بنفسك بقى وتكون شجاع .. وطبعا عارف السؤال اللى بيدور جواكم دلوقتى ..انا خااااايف اجرب واخطئ .. لانه موضوع مصيرى مايتحملش المجازفه ..!!
ايوه انا عارف وعلشان كده هاجاوبك ..بس الاول جاوبنى انت كده على السؤال ده : لو انت فضلت متردد كده كتير وخايف تجرب ..ايه اللى هايحصل ..؟اممممممممممم
انا هجاوب مكانك … هاضتطر تقبل باى اختيار لان الوقت والمهله اللى قدامك خلصت .. ووقتها هاتخضع لقرار ايجبارى سواء القبول او الرفض وهاتتحمل عواقب الاختيار الايجبارى غصب عنك
يبقى ايه الحل ..؟
يبقى الحل انى اجرب وانا معايا ..حقيبتى الخاصه اللى اتعودنا عليها تكون معانا واحنا بنختار قرار صح .. ودلوقتى افتح الجيب الثانى فى الحقيبه وهاتلاقى ورقه مكتوب عليها .. تجربه وقرار افضل من مراره الانتظار .. وافتحها واقرا اللى مكتوب فيها
طيب فيها ايه الورقه دى بقى ..؟
اولا : لازم تحسن الظن بالله عزوجل وتعرف انه هايوفقك للخير والصالح ليك فى حياتك .. وده مايكونش كلام وبس لازم توصل لمرحله اليقين .. ادعو الله وانتم موقنون بالاجابه .. يعنى وانت عارف انها هاتحصل .. وبكده يبقى انت بتسلم امرك وقراارك لله وهو يدبرلك شؤنك وحياتك : يبقى قول اللهم دبرلى شانى فانا لا احسن التدبير
ثانيا : لازم تتوكل على الله عزوجل مش على حد تانى .. يعنى يكون من جواك قناعه ان ربنا وحده اللى فى ايده القرار مش اى مخلوق تانى مهما كانت قدراته وامكانياته .. علشان كده ربنا عزوجل علمنا نقول : اياك نعبد واياك نستعين ..
ثالثا : ناخد بالاسباب المتاحه والممكنه قدامى .. وابذل قصارى جهدى فى اخراج كل امكاياتى وقدراتى او مثلا فى تجميع كل المعلومات اللى تفدنى فى مسروع معين .. او ادرس افكارى واخطط لها صح .. المهم اعمل كل حاجه عليا ممكنه
رابعا : تحدد هدفك كويس جدااا وتعرف انك داخل التجربه دى ليه ..؟ زعلشان ايه …؟ ومحتاج تحقق منها ايه ..؟ وايه اللى بتتمناه من التجربه دى ..؟ لكن ما تسيبش نفسك للفوضى والحظ وجمله زى ما تيجى تيجى .. لان بكده انت هاتخسر وهاتخرج من التجربه وانت شعارك الوحيد .. انا كنت بعاند نفسى ..يبقى لازم تحدد الاول انت عاوز ايه .. وبعدين تاخد بالاسباب فى التخطيط والاستعداد فى تحقيق الهدف على قدر همتك وحلمك
خامسا : استخير ربنا عزوجل وصلى صلاه استخاره واسال ربنا انه يوفقك للصالح ليك والخير ليك .. واذا كان شر يصرفه عنك ومايعلقش قلبك بيه ..
سادسا : الدعاء .. مهم اووى انك تدعى ربنا وتتذلل له انه يكرمك ويرضى عنك ..وانه يكون العون لك فى قراراك وانه يجعلك راضى به ..ويحقق لك ما تتمناه ..
سابعا والاخير : انك تدرب نفسك على مهارات الرضى وقبول النتائج مهما كانت .. ودى علامه من علامات الناجين والعظماء وهو الاستفاده من خبراتهم ونتائجهم .. خليك ذكى واحسبها صح واعرف ازاى لو فشلت التجربه احولها لنجاح من تانى بكل ايجابيه ونشاط ,, رضاك بالنتائج مهما كانت صعبه هايقويك على اتخاذ القرار وهايزيل الخوف من جواك ويخليك اقوى قول الحمد لله
هى دى الحقيبه اللى هاتساعدك على اتخاذ قرارك فى انك تخوض تجربه وتتعلم منها حتى ولو اخطات ..
يبقى كده فاضل المعيار الرابع عندى من معاير اتخاذ القرار فى حياتى …
4- الاسلوب العلمي:
_____________ ودى هاتكون تقريبا بتلخص اللى قولناه فى المعاير الثلاثه السابقه .. ودى انا بحب اسميها : بالورقه والقلم ياصديقى
البس النظاره بتاعتك .. اقعد على مكتببك ..هات ورقه وقلم وتعالى اقول تخطط ازاى لقرار عاوز تاخده فى حياتك :
1- اقعد مع نفسك وحدد هدفك
________________________
هات ورقه واكتب فى راس الصفحه من فوق : عنوان المشكله او القرار اللى انت محتار فيه بالخط العريض مثلا: محتار بين شركتين للعمل… وتحتها مباشره تكتب اهدافك اللى بتحلم تحققها من المشروع ده .. وتعددها فى شكل عناصر تحت بعضيعنى مثلا محتاج فلوس علشان تتجوز .. او محتاج مكانه اجتماعيه اعلى ..او محتاج تسافر فى بلد معينه .. حدد كل ده الاول
2- الاستقراء وتقسيم المشكله
_______________________
(ابدا فى تقسيم الورقه الى نصفين .. واكتب فى كل نصف الحاجه اللى انت محتار فيها .. زى مثلا شركه (الامل فى نصف الصفحه الاول .. وشركه ( التفاؤل ) فى نصف الصفحه الثانى.. طيب لو كانت حاجه واحده نعمل ايه ..؟ يبقى اكتبها فى اول السطر من الصفحه من فوق ..وتحتها اكتب انا عاوزها ليه ..؟ يعنى مثلا انا محتار فى شخص متقدملى للجواز ومش عارفه اقبل ولا لا ..؟اكتب فى نص الصفحه الجواز وتحتها : الجواز بالنسبالى معناه ايه ..؟ او محتاجه الجواز فى ايه وابدا اعدد الاهداف بتاعتى فى عناصر تحت بعضها من غير فلسفله اكتب اللى انا حاسس بيه ومحتاجه علشان هايتنبى عليه حجات هاقولها دلوقتى ..
3- المخابرات العامه وجمع البيانات :
__________________________
ودى مهمه جداااا علشان بناء على الخطوه دى هاتخذ قراارىودى ببساطه .. هاكتب فى كل نصف انا حددته فى الصفحه كل المعلومات اللى اعرفها عن الشركه دى مثلا .. بس اكتبها فى شكل ايجابيات وسلبيات ..يعنى الايجابيات كذا كذا .. والسلبيات كذا كذا
4- تحليل البيانات ومرحله اتخاذ القرار :
_____________________________
يعنى اقف مع نفسى واقارن الايجابيات والسلبيات ببعض .واشوف ايه اللى ايجابياته اكتر ..؟ طيب ايه الايجابيات اللى فى الاتنين تتماشى مع اهدافى وطموحاتى اللى كتبتها فوق .. وتساعدك اكتر فى تحقيق حلمك …؟ وبناء عليه تبدا تحدد ميولك وقرارك هايكون لايه اكبر … ونستخدم فى الحاله دى مساعده ميزان المشاعر والرغبه الداخليه .. انت ميال لايه اكثر من التانى ومرتاح لايه وحدد قرارك على طول :
5- التجربه واستخدام حقيبه ..انت قدها
._________________________________
ودى اتكلمنا فيها قبل كده .. واتفقنا لما ناخد قرار ونستعد يبقى نجرب من غير خوف ونستخدم معانا مساعده حقيبه ( انت قدها ) ..
6- تحليل النتائج وتقبلها .. والاستعداد لقلب الطاوله
______________________________________
ودى مهمه جدااااا .. هاتعملها ببساطه خالص زى ما هاقولك :اقلب الصفحه اللى معاك .. واكتب فىيها اللى هاقوله
فى وسط الصفحه : اقرار وتحتها تكتبب : اتعهد بانا فلان او فلانه وتكتب اسمك .. بان التزم بكل قرار ايجابى قمت باخذه .. وان ابذل قصارى جهدى فى اثبات صوابى فى تحقيق النتائج الايجابيه الناتجه عن هذا القرار .. كما اتعهد بان اتحمل نتائج قرارى مهما كانت وان اعمل جاهدا للرضى بها .. والعمل على تسخيرها لتحقيق اهدافى واحلامى ..
واسال الله العظيم ان يوفقنى فى تحقيقى هدفى وحلمى التوقيع .. وتكتبب اسمك
طيب وايه حكايه بقى قلب الطاوله ..؟ يعنى اجى تحت الاقرار واكتب ايه النتائج السلبيه اللى ممكن تحصل نيجه قرارى ..؟ او مثلا ايه الاخطاء اللى ممكن تحصل ..؟وافكر ازاى اقدر اتغلب عليها واحلها ازاى لما تحصل .. وايه البدايل اللى تساعدنى فى تحويل الاخطاء لايجابيات تساعدنى فى تحقيق حلمى من جديد
والفكره دى جميله اوى لانها هاتساعدك على الرضى بالنتائج وتوقع الايجابيات والسلبيات فى نفس الوقت ..وتساعدك على الذكاء الابداعى والتخيلى فى وضع حلول مسبقه لاخطاء ممكن تحصلك فى المستقبل
وبكده تقدر ببساطه وبسهوله تاخد قرارك ..وتكمل عليه من غير خوف ولا قلق ان شاء الله …
كلمه اخيره حابب اقولها مافيش حاجه فى الدنيا تستاهل الندم والحزن الشديد غير ندمنا على بعدنا وتقصيرنا فى حق ربنا عزوجل ..غير كده كل حاجه تقدر تتعوض ونصلحها حتى لو اخطائنا فيها ..يبقى من غير خوف وقلق ننفذ الحقيبه اللى اتفقنا عليها ونتمسك بيها وهى هاتساعدنا فى تحقيق احلامنا وفى اتخاذ القرار الصح من غير تردد
حقيبه انت قدها تاليف د. احمد يوسف
