ايه الالوان المناسبه للحوائط مع سرميك الارضى بني وابيضى
اهتمامنا بالوان الحوائط عاده يبدا عند الزواج والتجهيز للبيت الجديد او عندما نجدد في البيت..
وفي الحالتين بيكون نفسنا نختار الوان مناسبه لاستايل البيت وتكون بتعبر عنا..
وعلشان كده “بص وطل” كان ليها لقاء مع مصممه الديكور “مي عصمت” اللي هتقول لنا نصايح وخطوات تساعدك في اختيار الالوان المناسبه للطلاء..
وازاي تحققي توازن وتناسق بين الوان الفرش والارضيات والاثاث الموجود في كل غرفه …
وبدانا معاها الحوار وسالناها…
هل استايل الاثاث اذا كان مودرن او كلاسيك بياثر في اختيار الوان الحوائط؟!
اكيد طبعا.. لان الوان الحوائط لازم تكون مرتبطه بالشكل العام للمنزل والاثاث الموجود فيه، فمثلا اذا كان الاثاث مودرن يفضل ان الوان الحائط تكون بسيطه وبدون تفاصيل كثيره ، والمودرن بشكل عام بيعتمد على الالوان الزاهيه “المطرقعه ” زي الازرق والنبيتي والبنفسجي وغيرها، اما لو الاثاث اللي موجود في البيت كلاسيكي ممكن تستخدمي معاه الالوان الترابيه زي البيج بدرجاته المختلفه او الابيض او الذهبي.
ممكن تقولي لنا ازاي نقدر نختار الوان الحوائط؛ بحيث تكون مناسبه لالوان المفروشات؟!
دي حاجه بسيطه اوي، يعني اذا كانت المفروشات فيها نقوش كتيره وفيها اكثر من لون بنختار اقل درجه لونيه موجوده فيه ونستخدمها كلون للحائط، وطبعا لون الحائط هيكون ساده من غير اي رسومات او الوان كتير علشان شكل الغرفه يكون مريح للعين.
اما لو المفروشات كانت ساده ممكن نستخدم نقوشات او رسومات على الحائط او ندخل لونين في بعض، زي ان الحائط مثلا يكون مقلم بلونين.
طيب بالنسبه للمساحه ازاي ممكن تاثر في اختيار اللون؟!
مساحه المكان دي اول حاجه لازم ناخد بالنا منها اثناء اختيار الوان الحائط؛ يعني لو المساحه صغيره لازم نختار الوان فاتحه ؛ لانها بتخلي المكان واسع، اما لو مساحه الغرفه كبيره فبتكون مساحه الاختيارات في الالوان اوسع؛ لانك ممكن تستخدمي الوان غامقه او فاتحه حسب ذوقك.
هل كل غرفه في البيت لها الوان مناسبه لها؟!
اه طبعا.. لان كل مكان في البيت وله الوانه اللي بتكون مناسبه معاه وطبيعه كل غرفه هي اللي بتفرض الالوان دي فمثلا..
غرفه النوم
ودي طبعا الوانها لازم تكون هاديه وبسيطه ومريحه للعين زي اللون الروز والاوف وايت واللبني.
غرفه المعيشه
دي الوانها لازم تكون زاهيه ومن لون الفرش اللي موجود فيها.
غرفه المكتب
الغرفه دي دايما بنحاول نختار لها الوان معتدله الى حد ما علشان تساعد على التركيز زي البني بدرجاته المختلفه او الابيض، ومش مطلوب ان يكون فيها تفاصيل كتيره .
غرفه الاطفال
الوانها لازم تكون جذابه وزاهيه وتعمل شعور بالبهجه ، ومستحب جدا استخدام رسومات على الحائط في غرفه الاطفال.
هل في الوان معينه يفضل اننا ما نستعملهاش بكثره اثناء اختيار الالوان؟!
يفضل اننا نبعد عن اختيار الالوان الناريه زي (الاحمر والاورانج) خصوصا في الغرف اللي بنقضي فيها وقت طويل زي غرفه المعيشه ؛ لان الالوان دي بتثير الاعصاب وبتساعد على التوتر.
طيب بالنسبه للمطبخ واللي معظم البنات بتحتار وهي بتختار الوان الحوائط بتاعته؟!
المطبخ الشرقي بالذات بيستهلك بشكل كبير وبيتعرض للدهون والابخره اللي بتاثر على الوان الحائط؛ علشان كده الالوان الخاصه بالمطبخ سواء كان الحائط من السيراميك او عادي لازم الالوان تكون غامقه ، علشان تستحمل البقع، ونحاول نبعد عن الالوان الفاتحه ؛ لان اي بقعه بسيطه بتبان فيها.
ساعات كتير بنختار لون معين، لكن بعد الانتهاء من دهان الحائط بنلاقي ان اللون مختلف عن الدرجه اللي اخترناها في الحاله دي ممكن نتصرف ازاي؟
كتير بيحصل معانا الموقف ده؛ بسبب ان بيكون فيه اختلاف بين الالوان اللي بنختارها من الكتالوج، ولما تتنفذ على الحائط، ممكن تستخدمي اكسسوار في الحائط زي تابلوه مثلا ويكون فيه الدرجه اللي عايزاها، او تستخدمي رسومات على الحائط وده هيغير شكلها تماما وهيديها شكل جديد.
طيب هل اختيار الوان الطلاء ممكن يؤثر في توزيع الاضاءه في البيت؟!
اكيد طبعا.. فمثلا الالوان الغامقه زي الاسود والبنفسجي والبني بتحتاج لاضاءه قويه ؛ علشان تكون ظاهره ، اما الالوان الفاتحه مش بتحتاج غير اضاءه عاديه .
ممكن نستخدم اكثر من لون في غرفه واحده ؟!
انا مش بافضل استخدام اكتر من لون للحائط في غرفه واحده ؛ لانه بيعمل زحمه في المجال البصري وبيتعب العين، ولو ضروري نستخدم اكتر من لون فنحاول ان الفرش تكون الوانه ساده .
ايه هي موضه الوان الحوائط في 2024؟!
الالوان الموضه دلوقتي بالنسبه للحوائط هي اللافندر او الرمادي المائل للبنفسجي، كمان اللون الابيض رجع موضه تاني وخصوصا لو استخدمناه مع اللون الاسود؛ لانهم بيعملوا ميكس حلو جدا مع بعضهم.
ومن الالوان الموضه كمان البني الغامق والبنفسجي والفيروزي. اما اللون النبيتي فهو موضه طول الوقت وبيليق على استايلات والوان الاثاث المختلفه .
الكرانيش اللي بتكون موجوده في الحائط لسه موضه ولا لا؟
استخدام الكرانيش في الحائط مش موضه دلوقتي، والبديل لها هو عمل رسومات فنيه ملونه على الحائط وعلى السقف.
طيب بالنسبه لورق الحائط؟!
ورق الحائط اللي كان بيستخدم زمان مش موضه دلوقتي والبديل له هو الاستيكرز باشكال ورسومات مختلفه .
