مفيش شك ان حلم كل البنات هو الحصول على قوام مثالي ومتناسق بس للاسف ساعات كتير بيبقى تحقيق الحلم ده صعب شويه ، وتلاقي البنت قوامها مش متناسق، وفيه اماكن حجمها كبير شويه او شويتين.. يعني انا عارفه ان الموضوع ده ممكن يسبب لك مشاكل كتير قوي.
…
بس ولا يهمك احنا في غالى دايما حيكون شعارنا “مفيش مشكله الا وليها حل مدام احنا مع بعض”..
علشان كده فكرنا ودورنا وعملنا الملف الجامد ده علشان نحقق حلم كل بنت ونحل المشكله دي..
هاه عايزه تعرفي ايه حل المشكله دي..
يبقى مفيش قدامك غير انك ….. تكملى معايا للاخر ويكون عندك شويه صبر ههههه يلا بينا
ملف النهارده حيتكلم على اكثر المشاكل اللى بتواجه البنات وهى مشكله الاردااااااف وعلشان نعرف الحل لازم نتعرف على اسباب المشكله يلا بينا ………
اولا: الخمول وقله الحركه
يعتبر الخمول وقله الحركه والجلوس لفترات طويله بنفس الوضع سببا اساسيا من اسباب كبر حجم الارداف وكمان الكسل وعدم ممارسه الرياضه ، ده بالاضافه الى النوم بعد تناول الوجبات الدسمه زي العشاء والغداء.
ثانيا: الاكل
والنقطه دي بيندرج تحتها العديد من النقاط الفرعيه زي اتباع نظام غذائي سيئ والاكثار من تناول المواد التي تحتوي على مواد دهنيه او نشويه او سكريات عاليه
ثالثا: الحمل والولاده
وده لان الحامل اثناء فتره الحمل والولاده بيحصل لها تغييرات في هرمونات الجسم، ده بالاضافه الى ان الحامل ممكن انها تتبع نظاما غذائيا سيئا وكمان عدم ممارسه التمرينات الرياضيه الخاصه بالحامل، دي كلها عوامل ممكن تؤدي الى كبر حجم الارداف.
وكمان الحمل المتكرر سببب من اسباب ظهور المشكله وده لان العضلات بيحصل فيها نوع من الخمول والضمور بشكل عام، وبالتالي حدوث ترهلات للجلد ولعضلات الارداف بشكل خاص، الامر الذي قد يسبب ضمورا لهذه العضلات وعدم وجود فاعليه لها وهو ما قد يتسبب في تراكم المواد الدهنيه في هذه المنطقه
رابعا: الوراثه
بتلعب الوراثه دور كبير في عمليه تجمع الدهون في منطقه الارداف.
خامسا: الهرمونات
حيث يتركز تاثير بعض الهرمونات عند البنات في منطقه الارداف والفخذين وعند الشباب في منطقه الصدر.
بس كده.. دي كانت الاسباب…
بس ولا يهمك تعالي نعرف في الكلام اللي جاي الحل ايه؟
علشان نحل المشكله دي ونحقق حلمنا بالحصول على قوام مثالي يبقى لازم تاخدي بالك من شويه الحاجات دي وهي:
اولا: قائمه الممنوعات
لابد من انك تعملي قائمه بشويه حاجات ممنوع الاقتراب منها نهائيا لغايه ما تتخلصي من مشكلتك، وبعد ما تتخلصي منها ممكن تاكلي منها بس بحساب.
وقائمه الممنوعات هي:
1. المواد النشويه زي الرز والمكرونه والبطاطس المحمره .
2. المواد التي تحتوي على الكافيين.
3. الابتعاد عن المواد الدهنيه زي اللحم الضاني واللحوم المحمره .
4. الابتعاد نهائي عن المواد التي تحتوي على سعرات حراريه عاليه زي الوجبات التيك اواي.
5. منتجات الالبان زي الزبد والقشده واللبن كامل الدسم.
6. المكسرات بكافه انواعها.
7. الحلويات.. انا عارفه ان فيه ناس مش بتقدر تمسك نفسها قدام الحلويات وخاصه الشيكولاته بس معلش تعالي على نفسك شويه ، وابعدي نهائيا عن الحلويات
ثانيا: كلي خضار على قد ما تقدري
ده دايما حيكون شعارنا في غالى للصحه وهو “اهلا بالخضروات” وده لان المواد الخضراء فيها قيمه غذائيه عاليه مفيده للبشره ، ده بالاضافه الى ان معظم الدراسات العلميه اثبتت ان الخضروات لها اهميه كبيره جدا في انقاص الوزن، ده بالاضافه الى انها بتمد الجسم بقيمه غذائيه عاليه جدا ويبقى بكده انت ضربت اكتر من عصفور بحجر واحد.. حافظت على رشاقتك وعلى جمال بشرتك.
وياريت زي ما احنا حنتفق دايما ان طبق السلطه الخضراء يكون هو الطبق الاساسي على السفره ويكون مكون من الفجل والجرجير والبصل والثوم.. وعلى فكره الفجل الابيض بيحتوي على مواد بتساعد في اذابه الدهون من منطقه الارداف وده لانه غني بالالياف اللي بتسهل عمليات حرق السعرات والدهون الزائده بمنطقه الارداف
ثالثا: الرياضه
الرياضه ثم الرياضه ثم الرياضه حتى لو كانت الرياضه دي هي المشي لمده نصف ساعه يوميا وهتشوفي النتيجه بنفسك.
بس كده.. ده كان الحل
ولو عايزه تعرفي وصفات طبيعيه تساعدك لتخسيس الارداف خليك معايا وبلاش تزوغى من الصفحه هههه.
وصفات لتخسيس الارداف
وعلشان انا عارفه ان كل حبايب غالى بيحبوا الوصفات الطبيعيه جبتلكم مخصوص شويه الوصفات دي اللي هتساعد على تخسيس منطقه الارداف وانت اختاري اللي يناسبك منها.. نشوف مع بعض..
الوصفه الاولى
المكونات
• كوسه
• فاصوليا خضراء
الطريقه
اسلقي الكوسه مع الفاصوليا الخضراء وبعد كده اضربي الكوسه مع الفاصوليا الخضراء في الخلاط لغايه ما يكون شكلها على شكل عصير، اشربي منه كوبايه بعد كل وجبه .
الوصفه الثانيه
المكونات
• كوب من الماء
• معلقه من الزنجبيل المطحون ومعلقه من القرفه المطحونه
الطريقه
اغلي الماء وضيفي الزنجبيل والقرفه وبعد كده سيبيهم يغلوا واشربي فنجان منها قبل كل وجبه .
الوصفه الثالثه
المكونات
• بذره الكتان -هتلاقيها عند العطار- بتكون على شكل حبه السمسم بس لونها بني غامق.
الطريقه
كل اللي انت هتعمليه انك تاخدي منها معلقه او معلقتين صغيرين يوميا قبل النوم.
وعلى فكره الوصفه دي غير انها بتساعد على تخسيس الارداف والكرش فهي كمان بتفيد في الوقايه من سرطان الصدر والعياذ بالله ويبقى كده انت ضربت اكتر من عصفور بحجر واحد.
الوصفه الرابعه
المكونات
• خل التفاح
الطريقه
ادهني منطقه الارداف بخل التفاح واتركيها لمده عشرين دقيقه ثم خدي دش ميه فاتره وهتشوفي النتيجه .. كرري الموضوع ده مرتين في الاسبوع وبعد مرور شهر هتشوفي النتيجه بنفسك.
الطريقه الخامسه
المكونات
• معلقتين بن مطحون
• كوب ماء دافئ
الطريقه
يتم خلط البن بالماء لغايه ما يبقى على شكل عجينه وبعد كده تقومي بفرك العجينه دي على منطقه الارداف بحركه دائريه على اتجاه عقارب الساعه لمده عشر دقائق وعكس الاتجاه لمده عشر دقائق.
بعد كده هتلاقي ان المنطقه دي اصبحت عليها طبقه من الزيت.. قومي باخذ حمام دافئ، وكرري العمليه دي مرتين في الاسبوع لمده شهر وهتشوفي النتيجه بنفسك، ده غير ان الوصفه دي بتساعد على نعومه الجسم.
بس كده..
دي كانت مجموعه من الوصفات الطبيعيه اللي ممكن تعمليها للتخلص من كبر حجم الارداف..
وعلى فكره الوصفات دي مفيده جدا للناس اللي وزنهم مناسب بس عندهم مشكله في الارداف. يلا تعالى نشوف التماارين الرياضيه
تمارين رياضيه
وعلشان اكون عملت اللي عليا وقدمت ملف شامل فعلا، دي مجموعه من التمرينات الرياضيه اللى بحث عنها وجبتهالك اللي هتساعدك على تخسيس منطقه الارداف بس لازم تاخدي بالك الاول من شويه الحاجات دي وهي:
1- وانت هتبدئي ممارسه التمرينات دي حاولي انك تسخني عضلاتك علشان ماتبدئيش مره واحده وعضلاتك تشد.. يعني حاولي انك تسخني ببعض الحركات البسيطه كمرجحه الذراعين والرجلين، يعني ياريت تبدئي بالتدريج واحده واحده علشان لو بدات مره واحده هتحسي انك دايخه وتعبانه ومش قادره انك تعملي حاجه ، وهتكرهي التمرينات ومش هتجربي انك تعمليها تاني.
2- ياريت انك ماتعمليش التمرينات دي وانت لسه اكله ومعدتك ممتلئه بالطعام علشان ماتشعريش بدوخه .
3- وقفي التمرينات بسرعه اول ما تشعري بدوخه او صعوبه في التنفس.
4- لازم تاخدي بالك كويس من استقامه ظهرك في كل تمرين علشان ده مهم جدا علشان بطنك ترجع الى طبيعتها.
5- بلاش تيجي على نفسك قوي، يعني ماتبالغيش في ممارسه التمرينات دي على الفاضي والمليان بحجه انك كل ما تعملي اكتر تلاقي نتيجه احسن، علشان ممكن تلاقي نتيجه عكسيه .. يعني من الاخر كفايه نص ساعه في اليوم تعملي فيها تمرينات رياضيه .
يلا نشوف مع بعض
التمرين الاول
نامي على بطنك وايدك للخلف وبعد كده ارفعي ايدك ورجلك لفوق.. عدي خمس مرات ونزليهم تاني وبعد كده ارفعيهم تاني.. كررري التمرين ده 15 مره .
التمرين الثاني
والتمرين ده بيسمى تمرين السباحه وكل اللي هتعمليه هو انك هتنامي على بطنك وايدك مفروده للامام على الارض وبعد كده ترفعي ايدك ورجلك لفوق مع بعض في نفس الوقت، وتسيبيهم فوق وتعدي خمس مرات وتنزلي، وهكذا.. كرري هذا التمرين 15 مره .
التمرين الثالث
نامي على الارض مع مراعاه ان ظهرك يكون مفرود وحطي ايدك جنبك على الارض وبعد كده حاولي على قد ما تقدري انك تتني رجلك لغايه منطقه الصدر مع الاحتفاظ بايدك زي ما هي على الارض.. كرري التمرين ده 15 مره .
التمرين الرابع
نامي على ظهرك وايدك على الارض وبعد كده ارفعي رجلك الى اعلى ونزلي وهكذا.. كرري التمرين 20 مره .
التمرين الخامس
اقفي وخدي بالك ان ظهرك يكون مفرود، وارفعي ايدك لفوق على راسك، وبعد كده ميلي ناحيه اليمين مره والشمال مره .. كرري التمرين ده 10 مرات.
التمرين السادس
نامي على ظهرك وحطي ايدك خلف راسك على الارض، وبعد كده ارفعي راسك مع رجلك اليمين مره ، وراسك مع رجلك الشمال مره تانيه .. كرري التمرين ده 10 مرات.
التمرين السابع
اقفي مع مراعاه ان ظهرك يكون في وضع مستقيم وايدك في وسطك، وبعد كده انزلي برجلك للاسفل مع تني الركبتين للاسفل.. كرري التمرين ده 6 مرات.
التمرين الثامن
نامي عى جنبك مع وضع ايدك في وسطك وارفعي رجل ونزليها لمده 10مرات، وبعد كده كرري نفس الوضع بس مع جنبك التاني.
التمرين التاسع
وده هيحتاج منك ان يكون عندك الدراجه الثابته في البيت علشان تمارسي التمرين ده عليها لمده ربع ساعه يوميا.
