المقادير :
كميات متساويه من كل من الخضار التاليه :
بندوره , خس , بقدونس , خيار , جزر مبشور , ملفوف اخضر , بقله ( رجله او فرفحينه ) , اوراق فجل ( اذا عندك فجل , قصي الاوراق كامله بسواعدها و اغسليها جيدا ) و انا بحط فقط اوراق الفجل , ما بحط الفجل .
بصل : اخضر او عادي
ملح , زيت زيتون , نعنع يابس ( اطيب من الاخضر , و افضل لان الاخضر بيسود بعد الفرم )
خبز مقطع مربعات و محمص بالفرن مع شويه زيت زيتون
للتحميض : خليط من دبس الرمان , خل التفاح بنسبه تلت لدبس الرمان , و تلتين لخل التفاح ( هالخليط طعمته جدااااا لذيذه , و بتضفي عالفتوش طعمه خياليه ) .
و اذا ما عندك دبس الرمان , حطي فقط خل التفاح , و اذا ما تواجد حطي عصير ليمون .
و السر يلي راح قلكن عليه هلا , و مو كل الناس بتعرفه , لتحصلي على فتوش طيب و مميز , هوي :
التوم , دقي شويه توم صغار , و حطيهن مع الفتوش ,. و بيطلع اطيب بكتير , جربو , و راح تدعولي على هالسر , ولكن بيضل وضع التوم اختياري ’ و كمان بيطلع الفتوش طيب .
افرمي الخضار , و اتقيدي بالمقادير المكتوبه , افرميها فرم وسط اقرب الى الخشن
اخر شي حطي الخبز المحمص , و خلي كميته متناسبه مع كميه الخضار الموجوده بحيث ما حدا منهن يطغى عالتاني ( لا تحطيه قبل هيك : مشان ما يطرى , و يتشتش ) , و قلبي جيدا , و تاكدي انه كل الخبز اتشرب , الزيت و الحامض , و صبي الفتوش بالجاط , و فورا عالسفره
لازم هالخطوه , لان الخبز المحمص اذا حطيتيه من اول التقليب , او حضرتي الفتوش قبل الاكل بكتير : الخبز راح يطرى , و ساعتها بيخرب شكله و مذاقه , بينما بهالطريقه , الخبز بييتشرب الزيت و الحامض , و بيضل قاسي , و لمن بتاكليه , بتحسيه عم يقرمش بتمك .
