طريقه عمل العيش الصاج
لكل فتوكات عايزه تجدد العيش بتعها احلى ابتسامه
ايه رايكو نعمل عيش صاج مع بعض
طريقه سهله وطعمه تحفه ممكن تحطي في شوارمه او فراخ او كفته
او اي حاجه انتي عايزه بس بجد تحفه والله وانا مجربها
بس ماتنسوش التقيم
عيش الصاج زي اللي عند شاورما ابو مازن
“المقادير”
2 كوب دقيق
3\4 كوب لبن دافئ
2 ملعقه كبيره زبادي
ملعقه صغيره خميره فوريه
ملعقه صغيره سكر
نص ملعقه صغيره ملح
” الطريقه ”
احط الخميره و السكر علي اللبن و اقلب لغايه ما تدوب تمام او اغطيهم و اسيبهم 10 دقائق لحد ما يخمر
و بعدين احط الدقيق و عليه الملح و عليه الزبادي و اللبن و اقلب لغايه ما توصل لعجينه طريه
و بعدين احط ملعقتين زيت علشان ما تلزقش
و اغطيها و اسيبها لغايه ما تخمر و يتضاعف حجمها
و بعدين اقطعها كور صغيره و افردها بالنشابه علي رخامه مرشوشه دقيق
(لومعندكيش نشابه مش مشكله اي ازازه مدوره تفي بالغرض)
لغايه ما تكون دايره متوسطه الحجم
و علشان اسويها
لو عندك صاج في البيت
حطيه علي النار علي البوتاجاز من فوق
و حطي عليه العجين و لما يحمر اقلبي للوجه الاخر
انا باه معنديش صاج
فبجيب الصينيه التيفال و اقلبها علي وشها علي النار و استخدمها علي انها صاج
(طبعا علي العين الصغيره في البوتاجاز)
و ماتخافوش الصينيه مش هيجرالها اي حاجه
بالهنا و الشفا
