طريقه عمل كفته اللحم بالخضار
* ½ كيلو لحمه مفرومه
* بيضه مخفوقه بالملح والفلفل الاسود
* ¼ كوب برغل ناعم مغسول ومصفى
* ½ كوب بقسماط مطحون
* بصله متوسطه الحجم
* ثمره فلفل اخضر حار
* ¼ حزمه بقدونس
* ملعقه كبيره توابل
* ملح وفلفل اسود
مقادير الخضار:
* ¼ كيلو بسله مسلوقه ومصفاه
* ¼ كيلو فاصوليا مسلوقه ومصفاه
* 2 ثمره بطاطس مقطعه قطع صغيره
* 2 ثمره جزر مقطعه قطع صغيره
* ¼ معلقه صغيره ريحان مجفف
* بصله مقطعه قطع صغيره
* 3 فصوص ثوم مفرومين
* 2 ملعقه كبيره سمنه
* 2 كوب عصير طماطم
* 2 كوب شوربه لحمه
* ملح وفلفل اسود
الطريقه :
1- لتجهيز الكفته ؛ افرمي كل المقادير ما عدا اللحمه المفرومه في الكبه او في الخلاط، وضيفيها على اللحمه المفرومه وقلبيهم كلهم مع بعض كويس.
2- بعد كده شكلي اللحمه على شكل كرات ورصيها في صينيه بايركس مدهونه بملعقه زيت، ودخليها الثلاجه لمده 10 دقائق علشان الكفته تتماسك، وبعد كده دخليها الفرن على درجه حراره متوسطه لمده نص ساعه او لغايه ما تلاقي ان الكفته استوت.
3- لتجهيز الخضار؛ شوحي البصله في السمنه على النار لمده 5 دقائق او لغايه ما تلاقي لونها بقى ذهبي، وبعد كده ضيفي عليها كل الخضار الموجود عندك والثوم، وقلبيهم كلهم مع بعض على النار لمده ربع ساعه .
4- ضيفي عصير الطماطم والملح والفلفل الاسود والريحان، وسيبيهم على النار لمده 10 دقائق علشان الطماطم تتسبك.
5- بعد كده ضيفي الكفته والشوربه وسيبيهم على النار لمده 10 دقائق؛ علشان الكفته تتشرب من الطماطم، بعد كده اغرفيها في اطباق التقديم، وقدمي معاها طبق ارز ابيض، وبالف هنا وشفا.
