طريقه عمل الجبنه الكسات في البيت بالصور

الكميه هتديكى كوبايه ونص جبنه:

كوبايه لبن
معلقه خل
حطى الحليب على النار لحد ما يغلي
حطى الخل حتلاقيه راب و اتكتل وبعدين تطفي النار
جهزى مصفاه بلاستيك او مصفاه الخلاط
وحطى جواها شاشه او قماشه قطن او ايشارب قديم
وكبى اللبن عليها واستنى لحد ما يتصفى

اللى فاتت دى طريقه عمل الجبنه العاديه هى زى الجبنه القريش ممكن تحطيها فى التلاجه وتاكليها بعد حوالى اربع ساعات
تحففففففففه
لو عاوزه تحوليها لجبنه كاسات

حطى الجبنه اللى اتكونت عندك في الخلاط وعليها شويه ميه صغيرين
وحوالى معلقتين كبار زبده
صفرا او بيضا لو زبده صفرا هتطلع لك الجبنه اصفره
لو الزبده بيضا هتطلع لك ابيضه
وانتى وزوقك يا قمر بس حاولى تطلعى الزبده من التلاجه قبلها بفتره عشان وانتى بتضربيها متكونش تقيله على سكينه الخلاط
ومعلقتين قشطه وكل ما زودتى القشطه كل ما طلعت اطعم معاكى بس متزوديش اوى يعنى

ملح وممكن تضيفى اى نكهه انتى عاوزاها فلفل حار او حبه البركه او زعتر
واضربيهم فى الخلاط ضربا مبرحا
وبعدين حطيهم فى برطمان ازاز
واحفظيهم فى التلاجه
حتاكلي احلى جبنه كاسات
طريقه عمل الجبنه الكيرى

كلها على البارد مش هنستخدم النار خالص
كوبايه لبن بودره نيدو او اى لبن مجفف يكون كويس
قطعه جبن واحده من لافاش كيرى
3 معالق زبده
ليمونه متوسطه
كوبايه حليب سائل
الطريقه

ناخد الزبده ونذوبها ونتركها تبرد

وناخد الحليب السائل نضعه فى الخلاط ونضيف

عليه الزبده المذابه

ونضربهم كويس اوى وبعدين نحط اللبن البودره ونضرب
وبعدين قطعه

لافاش كيرى

ونضرب بالخلاط

وبعد ما نضرب نضيف عصير اللمونه نقطه نقطه واللمون ده عشان يحفظها ومتبوظش بسرعه وبرده بيساعد عشان اللبن يتحول لجبنه

وخلى الخلاط شغال

لحد ما تتماسك معاكى شويه شويه وهتكون زى الجبنه السايله كده

وبعدها تكونى مجهزه قالب مكعبات التلج وتحطى فى كل واحد قطعه فويل
او تجيبى علب بلاستيك صغنونه اى شكل وتحطى جواها فويل وتصبى عليها الجبنه وبعدين تحطيها فى التلاجه لحد ما تتماسك وتقفلى الفويل بعد كده
بس بصراحه الطريقه دى لقيتها متعبه اوى انى اغلف كل حته لوحدها
فابقيت بحطها فى علبه بلاستيك مستطيله
واغطيها كويس واقطع منها بالسكينه
وممكن تكليها فى اى وقت

ومده الصلاحيه فى الثلاجه اسبوع

بس مين حيسيبها اسبوع

لذيذه جدا

ومده التحضير مبتاخدش عشر دقايق