فراخ في الكيس الحراري
بصله كبيره مفرومه ناعم وعليها ملح وفلفل وعصير ليمونه كبيره (عشان تنزل ميتها )
1 م ك خل – 3 م ك زيت زيتون او ذره
2م ص كارى -1م ص بابريكا حلوه – ربع م ص شطه – 1/2 م ص كركم
1م ص من كسبره ناعمه – كمون – جنزبيل -بهارات دجاج -ملح – بهار مشكل
المفروض ان الوصفه فيها توم وجنزبيل فريش وفلفل اخضر
انا استغنيت عنهم وحطيت البصله وجنزبيل بودره وممكن توم بودره لو حبيتى
نحط الزيت والخل وجزء من ماء البصل على التوابل كلها وتبقى بالشكل ده
نعمل مساج للفرخه الحلوه دى بنص كميه التوابل وندلكها كويس جدا زى العروسه
بين الجلد واللحم ومن الداخل والخارج
الجزء الباقى من التوابل حطيت عليه البصله وكررت تانى المساج ودلعتها جدا
وخليتها فى التلاجه من بالليل للصبح عشان تبقى فله شمعه منوره وريحتها تجنن
هنحضر الخضار حسب الرغبه
جزر صغير – بطاطس ارباع – بصله مفرومه خشن – حبه طماطم وممكن كوسه
الخضار بيكون حجمه كبير عشان ما يتهريش
هنحط كل اللى عملناه فى الكيس بدون اى حاجه لادهون ولا دقيق
ونحط فى داخل الفرخه جزء من الخضار والبصل
ونحط الكيس فى صينيه عاليه الحواف ونقفل الكيس بالقفل المخصص ونقص الزياده
ونقص الكيس من فوق او نخرمه بالسكينه من فوق فقط باكرر تانى اهو
عشان نسمح بخروج البخار و هتلاحظى ان الكيس انتفخ جدا فى الفرن
هندخله الفرن الرف الاسفل نص ساعه وبعدين تهدى النار وتسيبيه ساعه كمان
يعنى ساعه ونص ويكون جاهز ان شاء الله
لو الفرخه اقل من كيلو يبقى الوقت اقل
