كنافه عش البلبل
المكونات:
نصف كيلو كنافه طرح (واسمها بردو فى المحلات كنافه بورما)
2 كوب سمنه سايحه
كوب ونصف سيرب تقيل بارد(السيرب هو الشربات او القطر او الشيره )
بندق ولوز للحشو(وممكن فستق او اى مكسرات تانيه يعنى حسب الرغبه )
ملحوظه :المكونات دى على قد الصينيه اللى انا مصوراها
الطريقه
هنقطع منها جزء صغير
ونلفه على ايدينا زى كده
شايفين اخر الخصله اللى قطعناها دى نمسكها بالايد التانيه ونشدها واحنا بنلف بس طبعا الايد التانيه كنت بصور بيها فعشان كده الخطوه دى مش ظاهره
لازم نشد بالايد التانيه عشان الاساور تبقى ماسكه نفسها ومتخافيش مش هتتقطع منك
ومش شرط نلف على ايدينا ممكن نجيب اى حاجه نلف عليها زى المعلقه الخشب او قلم مثلا اللى يريحنا
ونبدا نرص فى الصينيه بشكل دائرى ونحط فى كل واحده نعملها المكسرات
لغايه ماتخلص الصينيه
هنسيبها بره ومن غير اى سمنه ليله كامله عشان تعضم وتنشف وتكون متماسكه
ولما نيجى نساويها هنحطلها كميه السمنه وهتكون سايحه بس مش سخنه واللى تفتكر السمنه الكتير لاء هى مش كتير ولا حاجه هى بتتحمر فى السمنه دى فى الفرن وكمان لما بنخرجها من الفرن بنصفى السمنه الزياده وهى اساس سواها كميه السمنه دى وده من عوامل نجاحها وفيه ناس بتحط اكتر مانا حاطه بكتير
هنا واحنا بنحط عليها السمنه
وهندخلها الفرن على حراره عاليه (200 مثلا)
ده شكلها فى الفرن قبل ماتستوى على الاخر
ونطلعها لما يبقى لونها دهبى وفيها ناس بتحبها اغمق من اللى عاملاها بس انا شايفه ان كده معقول
اول مانطلعها نصفيها من السمنه الزياده
ونحطلها السيرب البارد
وممكن لما تبرد شويه نصفيها من السيرب الزياده بس على فكره ممكن تحطو سيرب اكتر للى بيحب السكر الزياده فى الحلويات
ونقدمها لما تبرد
وده شكلها
عوامل نجاح الكنافه الاساور:
اولا الكنافه لازم تكون كنافه طرح مينفعش كنافه عاديه
ثانيا لازم تكون طازه جدا لو اتحطت فى الهوا نشفت او باتت مش هتنفع
ثالثا واحنا بنشتغل بالكنافه لازم تكون متغطيه بقماش مندى يعنى مبلول مياه عاديه مش ساقعه بس معصور كويس جداااا
رابعا هتسالونى هو النص كيلو عمل صينيه واحده بس هقولكم انا اسبعدت القطع المنعكشه فى الكنافه عشان الاساور متبقاش منعكشه معايا لان طبعا على مانجيب الكنافه من المحل ونرجع بيها البيت فيه اجزاء منها هتتبهدل والقطع اللى استبعدتها دى فى الاخر اخدتهم وقطعتهم وعملت بيهم صينيه كنافه عاديه بالقشطه
يارب موضوعى البسيط ده يكون عجبكم
- طريطريقة عش البلبل بالمكسرات
