ما هى اقسام كلية الهندسة

ما هى اقسام كليه الهندسه

اولا الاقسام الموجوده بكليه الهندسه بحلوان

ميكانيكا
1. طبعا اجمل قسم فى الهندسه …. اللى يدخل ميكانيكا لازم يعرف انه قسم صعب جدا بس لو حتحبوا حيكون لذيذ جدا……

2. لو عايز تدخل ميكانيكا لازم تعرف ان كتاب الفيزياء بتاع ثانويه عامه اللى درسته حتلاقى كل فصل منه بقى ماده ولا اثنين فى القسم وعلى فكره مش معنى ان القسم اسمه ميكانيكا انك حتاخد ميكانيكا لغايه لما تموت…. لا القسم اغلبه مواد فيزيائيه و تصميم……

3. لازم تعرف ان قسم ميكانيكا اقوى و افضل قسم فى مصر على الاطلاق …. وانا بقول كده من واقع الشغل والحياه العمليه اللى بره الكليه …..

5. نطاق شغل مهندسين ميكانيكا بره كبير و مراتبتهم حلوه

6. ينقسم الى انتاج و صناعيه و ميكاترونيك

ميكانيكا(انتاج)
1.طبعا مجال الانتاج ده من اكثر المجالات الرهيبه جدا و اللى مش اى حد شغال فيها و مرتباتها عاليه جدا طبعا لو طلعت مهندس فاهم و حتبقى استشارى فى حدود 7 سنين من تخرجك

2.ولازم تعرف ان انتاج اصعب قسم فيكى يا هندسه على الاطلاق….. وانك احتمال 85% حتسقط سنه ولا اثنين فى النص

3. الدراسه فيه 50% انتاج….. والانتاج هوه بالضبط اللى اخذتوه فى اعدادي بس بتوسع كل باب من اعدادى بيكون نصف الكتاب

4. مجال العمل يكون فى المصانع و تشغيل الماكينات فى الورش الصناعيه الكبيره و احيانا فى مجال تاكيد الجوده .

–
ميكالكترونيك
1. قسم جميل يجمع بين ميكانيكا و الكترونيات فى دراسته
2. مجال عمله محدود فى مصر يعنى من الاخر فى الغالب حتطلع تشتغل فى ميكانيكا او الكترونيات مش الاتنين مع بعض زي ما هوه مفروض

3. اما لوكنت حابب الموضوع وابدعت فيه مش عايز اقولك انك حتبقى ايه …

كهرباء
1.مهندس الكهرباء بيستلم من مهندس اميكانيكا و من المجالات اللى مجال شغلها واسع جدا زي ميكانيكا

2.و مواضيع دراستها تتلخص فى كل ما يخص الكهرباء و قليل من الالكترونيات…. يعنى لو مش فاهم كهربيه اعدادى او حاسس انها تقيله على قلبك…. اياك تدخل قسم كهرباء يااما للاسف ممكن ماتطلعش منه..!!!

3.حيكون نطاق عملك فى كل حاجه و اي شركه هندسيه حتكون فيها مهندس كهرباء

–
اتصالات
1. لو حابب اتصالات و عايز تتدخلها و عندك حد يشغلك بره مصر….تبقى عبيط لو مدخلتهاش….. اما لو حتفضل جوا مصر فلازم تعرف ان مجال اتصالات ضيق للغايه و يكاد يكون منحصر فى شركات الاتصالات و المحمول و البترول فقط…. وشوف بقى كام الف مهندس اتصالات بيتخرج…

2. مواد اتصالات تشبه مواد كهرباء اوى لان اتصالات جزء من كهلرباء اصلا …

3. اغلب مهندسين الاتصالات فى مصر بيشتغلوا فى الاخر يا اما مهندسين كهرباء او مهندسين كومبيوتر …. طيب ما تدخل كهرباء او كومبيوتر من الاول و لخص….

4. و ينقسم القسم الى حاسبات و الكترونيات

طبيه
1.طبيه هى عباره عن خليط من مواد قسم ميكانيكا على كهرباء على مواد طبيه احياء و كيميا عضويه…. وقسم طبعا مش سهل…بس طبعا كلامى ده ميفرقش كتيير مع اللى حيدخلوا… ده حيكون من المتفوقين…..يعنى ياكل الزلط

2. طبعا مفيش غير حلوان و القاهره اللى فيهم طبيه يعنى اقل من 100 مهندس طبيه كل سنه بيتخرج و دى طبعا ميزه

3.طبعا مفيش كلام على القسم…. بس واللى تجيلوا و مايدخلش يبقى عبيط…. بس ورينى يا حدق انت و هيه حتجيبوا مجموعها ازاى
ثانيا الاقسام الموجوده بكليه الهندسه بالمطريه

ميكانيكا باور
1. خليط بين قسم الميكانيكا و الكهرباء نفس المواد بتاعت القسمين و مجال شغله كويس جدا

– سيارات:

1. القسم ده قريب جدا لميكانيكا و بنصح بيه الاولاد بس… بس على البنات حيقكون صعب شويه …. الا اذا كنتى ناويه تتجوزى و تقعدى تربى عيالك

3. القسم ده مفيش منه الا فى كليتين بس …يعنى عدد المهندسين السيارات اللى بيتخرجوا كل سنه فى مصر كلها ميعدوش 300 مهندس وده عدد قليل جدا و ميزه طبعا

4. ممكن بعد ما تخلص ميكانيكا برضه تشتغل فى مجال سيارات.

5. المواد اللى فيه كلها تتعلق بالصيانه و محركات الاحتراق الداخلى و الفيزياء – بس مش زى ميكانيكا طبعا – وانظمه التعليق وعلى فكره المواد بتاعتهم قريبه قوى قوى من ميكانيكا بس امتحانتهم اسهل بكتيييييييييييييير

عماره
1. قسم عماره ده بقى قسم البنات او الاولاد اللى بيحبوا يقعدوا وسط البنات…!!!! او المواهب طبعا…

2. القسم ده بنسميه تجاره هندسه علشان محدش بيسقط فيه ولا حتى بيشيل ماده ….. ده اللى بيجيب جيد….جيييد… بيعيط..!!!! وده ميزه للى عايز ينجز و يخلص.

3. طبعا القسم ده المذاكره فيه قليله خالص بس المجهود البدنى فيه عالى جدا… يعنى لو كنتى بتاعه بابى و مامى ونونو.. متفكريش فى القسم ده خالص

4. يعنى ممكن ايام المشاريع تقعدى شغاله مثلا لغايه 12 ليلافى الكليه

5. لو عندك حس فنى و قدره على الابتكار ادخل القسم ده على طوول… و لو عايز تدخلوا منظره او علشان تفرح بالمسطره اللى حتكون اطول منك …بلاش.. مش حتسقط حتنجح برضه و حتجيب جيد…. بس حتتخرج من الكليه علشان تقف على “عماره ” تحرسها -بواب يعنى-

6. عيب القسم ده انه مجال عمله لا يسمح بوجود انصاف المواهب… يعنى لو عندك موهبه حتطلع تشتغل فى احسن الاماكن و بمرتبات خرافيه .. بس لو موهبتك عاديه حتشتغل بقرشين….

8. مواد القسم اغلبها رسم و مواد من قسم مدنى وهى مواد تتعلق بخصائص المواد و الانشائات و المساحه وحاجات بسيطه و لذيذه

مدنى
2. القسم ده بقى جمع المعادله الصعبه ومسك العصايه من النص…يعنى لا هوه صعب قوي زي ميكانيكا وكهرباء ولا هوه سهل اوى زى عماره …..لا مجال عمله واسع اوى زى ميكانيكا و كهرباء و لا ضيق زى عماره …و دى ميزه للى بيحب المعقول

3. القسم ده مشكلتوا ان تسليم الشيتات بيكون تقريبا اسبوعى طول السنه

4. و المواد فيه كلها بقى خرسانه و طبيعه مواد و سدود و سكك حديد و مساحه و هندسه انشائيه ….

5. الفرق بين المهندس المعماري و المدنى ان الاول بيرسم و التانى بينفذ …. يعنى الاثنين بيسلموا لبعض

6.مجال شغله مش بطال بس فيه سنه بهدله شويه

7. واللى نفسه يبنى عمارات و سدود و كباري و انفاق يدخل مدنى على طوول

اقسام خارج جامعه حلوان

كمياء
1. اولا القسم ده موجود فى القاهره و فى هندسه العاشر….

2. قسم انا شايف انه مالوش مستقبل لانك لا حصلت مهندس بترول و ولا جبت علوم قسم كمياء…. يعنى ممكن تدرس كمياء فى مدرسه خاصه لما تتخرج.

3.مواد دراسته تتلخص فى كتاب الكمياء اللى تخذته فى اعداداى حتلاقيه بقدره قادر بقى مواد و كورسات و كتب و اتمط و اتوسع و بدل ما حتخده فى ترم حتدره فى اربع سنين …
نوويه
1. القسم ده موجود فى هندسه الاسكندريه فقط….

2.طبعا قسم حكايه و روايه وشوف بقى المجال النووى والذرى فى العالم وصل لغايه فين فى جميع المجالات

3.لما تتخرج من القسم ده حتلاقى مستقبل مشرق فى المكان الوحيد اللى بيشغل بتوع الذرات فى مصر – مع الاعتذار لجورج سيدهم – الا و هو المركز القومى للطاقه النوويه و طبعا مرتب رهيب حوالى173 جنيها و لما تتجوز حيراعوا ده وحيزودوك حوال 6 جنيه .

4. اما لوحتسافر بره بالتحديد امريكا انسى بقى مصر لانهم مش حيخلوك تشفها تانى بس روح بقى هناك و تبقى عالم كبير و مش بعيد تعمل قنبله نوويه …. بس لما تقف على ديلك مش حترجع مصر تانى

5. مجال دراستها ينحصر فى الفيزياء الكلاسيكيه -اللى زى اللى درستها فى اولى ثانوي- و الفيزياء الحديثه

طيران
1. موجوده فى القاهره فقط.

2. قسم من الاقسام الداخليه لميكانيكا وطبعا مجال جامد و برستيج عالى جدا

3. ممكن تدخل ميكانيكا و تخلص و تعمل دبلومه فى الطيران و تبقى مهندس طيران قد الدنيا

4. نفس دراسه ميكانيكا بس مع التركيز على الايرو ديناميك بشده ..

قسم البترول و التعدين
1. هتتخرج هتبقى مهندس بترول قد الدنيا و بمرتب جامد جدا و يا سلام لو سافرت بقى بره مصر و يا سلام اكتر لو مهندس شاطر بره مصر هيدوك شقه و اقامه و تظبيط يعنى مرتبك كله فى البنك

2. بس ممكن اى مهندس تانى يروح يشتغل فى المجال ده و لو شاطر هيبقى احسن من بترول نفسه

• صور كلية الهندسة