طريقة عمل كفتة الفراخ المشوية

المقادير:

1/ 2 كيلو اوراك فراخ مفرومه
2 حبه بصل مفروم
كوب بقدونس مفروم
2 ملعقه كبيره بقسماط
ملح وفلفل
ملعقه صغيره بهارات فراخ
عيدان شيش للشوي

الطريقه :

1- افرمي البصل واعصريه من الميه كويس، وخلي الميه على جانب، وبعدين اخلطي البصل ده مع الفراخ والبقدونس والبقسماط، وتبليها بالملح والفلفل والبهارات.

2- اعجني الكفته شويه لحد ما كل المكونات تتداخل كويس، وحطيها في التلاجه وسيبيها لمده نصف ساعه علشان ماتفكش منك وانت بتشويها.

3- بعد كده ابدئي صبعيها على الاسياخ، وبلي ايديك بميه البصل وانتي بتصبعيها علشان تدي لها نكهه وكمان تدي لها لون حلو، وحاولي تخلي الكفته رفيعه علشان تتشوي كويس.

4- بعدين اشويها على الجريل او في طاسه تكون مابتلزقش، وحاولي اول لما تحطيها على الشوايه تقلبيها من كل الاجناب علشان تمسك كويس، وسيبيها لحد ما تستوي كويس، وقدميها مع سلطه الطحينه ..