سندوتشات جميلة وسريعة للاطفال

سندوتشات جميله وسريعه للاطفال

اكتر حاجه بتحير الامهات ايام الدراسه هي سندوتشات الاطفال خاصه انهم بيحبوا التجديد كل شويه ولانها شيء ضروري مينفعش نهمله هنقدم ليكي افكار متنوعه عشان متحتاريش كل يوم هتعملي ايه سندويتشات لطفلك ويعجبه :

الفكره الاولى

لازم ننوع لطفلنا من فاكهه وخضار وسندوتشات ونجيب علب صغيره نحط فيها كل حاجه ونقفلها هيحبوها الاطفال وهيحسوا بالتنوع ومثال لكده :

نحط في علبه شويه مكسرات زي جوز ولوز وعين جمل ” يساعدوا الطفل على المزاكره والتحصيل ويحموا خلايا المخ ”

وفى علبه تاني شويه خس مع قطعه من كوسه بالباشميل صغيره ممكن تكون باقيه من وجبه الغذاء اللي عملتيها اليوم اللي قبله .

وفي علبه تالته نحط حاجه يحلي بيها الطفل وتكون مغذيه زى قطعه من كيكه الزبادي ” الطريقه : اخلطي كوب بيض مخفوق مع كوب من السكر ورشه فانيليا واخفقي حتى تحصلي على رغوه ثم ضيفي كوب دقيق بالتدريج واخفقي ثم علبه زبادي واخفقي ثم في النهايه ضيفي ربع كوب زيت واخلطيهم معا وفي صينيه مدهونه سمنه حطيها في فرن ساخن 180 درجه لمده 20 دقيقه ” .

الفكره الثانيه

في علبه نحط شويه كشري ” تمد الطفل بكل النشويات الضروريه للحصول على الطاقه اللازمه في يومه الدراسي ” ومعاها فطائر محشيه سبانخ وجبنه شيدر او جبنه بيضا بيبقى طعمها حلو ومغذيه

وفي علبه تانيه نحط قطع من المانجو مع شويه مكسرات.

الفكره الثالثه

في علبه نحط سندوتش صغير بيض مقلي بالطماطم والفلفل الاخضر غني بفيتامين سي ومغذي مع شرائح خيار مقشره .

وفي العلبه الثانيه نحط كب كيك شيكولاته يحلى بيها

مع عصير فواكه ومكعب جبنه كيري او اي جبنه مثلثات بيحبها طفلك وطبعا مننساش زجاجه الميه خاصه تحمي الطفل من الجفاف في الجو الحار وعند التعرض للشمس.

الفكره الرابعه

في علبه نحط فطيره محشيه خضار وسندوتشات على شكل لفائف سوشي ” الطريقه : جيبي العيش التوست وافرديه بالنشابه اللي بتفردي بيها العجائن واحشيها بالتونه و الخس وممكن كل يوم تحشيها حاجه لان الاطفال هيحبوها جدا كفكره لذيذه للسندوتشات ولفيها زى السوشي او السويسرول وقطعيها كل قطعه تكفي لقمه مع قطع خيار وفلفل احمر .

وفي علبه تاني نحط كيكه مخبوزه بالدقيق الاسمر مع قطع تفاح مقشر

الفكره الخامسه

في علبه حطي كوكيز عين الجمل مع شرائح الجبنه الشيدر واعمليها باشكال علشان ياكلوها الولاد مثلا شكل ورده مع لفائف الاومليت بحشو جبنه ” بعد ما تعملي الاومليت ادهنيه جبنه من ناحيه واحده ولفيها رول وقطعيها لقم صغيره وقدمي معاها قطع طماطم .

وفي علبه ثانيه : حطي شرائح فواكه وليك تفاح وكيوي ” الكيوي يحتوي على فيتامين سي اربع اضعاف البرتقال”

وحطي قطع بسكوت معها وممكن نحط علبه زبادي او زبادو بالفواكه لذيذ ومغذي .