لحد امتى ناجل وندمر فى نفسيتنا وفى جسمنا؟؟
الخسسان والرشاقه مش مستحيل..ممكن تحققى حلمك اللى دايما بتاجليه
انا قدرت الحمد لله
خسيت ما شاء الله لاقوه الا بالله 57 كيلو
وبثبت وزنى دلوقت
كنت 127 كيلو..ودلوقت وزنى 70 كيلو
تعالى معانا وحققى الحلم باذن الله.
.قولى .توكلت على الله..ربى انى احول بحولى وقوتى الى حولك وقوتك فانه لاحول ولاقوه الا بك
ادعوا لى اقدر اثبت وزنى
ازاى خسيت؟؟؟؟؟؟
باختصار
واهم نقطه الصبر وطوله البال..وما نستعجلش النتيجه .وايانا والياس..لاتقنطوا من رحمه الله .
1-ابتديت برجيمات متوازنه واكلها مليان شويه..علشان ما اضعفش فى البدايه
يعنى نبتدى مثلا ب 1400-1600 سعر حرارى((زى الرجيم الكلاسيك لراضا بهنوس..او الرجيم المثالى للدكتور اسامه حجازى..او اول اسابيع رجيم دكتور بهاء الدين ناجى))
بعد كده بنتدرج كل شهر فى تخفيض السعرات الحراريه ..لان اكيد الجسم بيتاقلم على الرجيم
2_وكنت باخد اعشاب لسد النفس وتعليه الحرق(زنجبيل.قرفه .شاى اخضر.نعناع.كمون.مراميه) بنطحن الكل مع بعض..وناخد معلقه منهم على كوب ماء مغلى واشربها لما تبرد قبل الاكل بثلث ساعه
3- عملت وصفه ميمو لنسف الدهون..حتلاقيها فى المرجع..بتنزل فى مقاسات الجسم مش فى الميزان((فى شهر ونصف..خسست بطنى 22 سم))
وكمان بتشد الجلد وتمنع الترهلات
4- الرياضه ما كنتش بعمل فى الاول لان وزنى كان كبير وده خطر على المفاصل
بالكتير كنت بمشى ربع ساعه او نصف ساعه فى اليوم..لحد مانزلت شويه .ومفاصلى ابتدت تلين..وكمان الرياضه لازم بالتدريج
5 دقائق..بعد يومين او ثلاثه نزود 5 وهكذا
.وابتديت اعمل على العجله .او امشى ساعه .متوزعه على اليوم..نصف ساعه الصبح ونصف ساعه باليل
الرقص بيخسس ويرسم الجسم بطريقه خيال.وفيه فى مرجع الرياضه فيديوهات تمارين للمشى فى المكان..تحفه بجد بتعملى الرياضه معاهم وفى البيت من غير خروج ولا بهدله..ومش حتحسى بالوقت
ابتدى بالفيديو الاول..وبعد اسبوع خليهم الفيديو الاول والثانى..بعد اسبوع كمان اعملى ال3
وهكذا لحد ما تعملى ال5 فيديوهات.
5-المهم اوعى والرجيمات الكيميائيه ..بتبوظ الحرق..وبتثبت الوزن بعد فتره ..لفتره كبيره
واوعى يغريكى الارقام الكبيره اللى بيقولها..ممكن تنزليها..لكن اقل اكل حترجعى اضعاف اللى نزلتيه
6-شرب الماء بكثره ..قبل الاكل ..او بعد الاكل بساعه وليس اثناء الاكل(مش اقل من ليترين فى اليوم)
7- خلى عندك دايما خضارعلشان لو جعتى بين الوجبات وحتى لو اكلتى فاكهه ..ارحم من الجوع اللى ممكن يخليكى تهورى وتاكلى بفجع اكل يضر الرجيم
8-اوعى تكنسلى وجبه
بالعكس ياريت تتعودى يبقى اكلك 5 او 6 وجبات..3 .. فطار وغداء وعشاء
وال2 او ال3 يبقى تفاحه او.برتقاله .اوخيار.اوجزر .او كوب شاى بربع كوب لبن خالى الدسم محلى بمعلقه عسل ابيض
علشان معدل حرق الدهون يفضل عالى..واوعى تفتكرى ان تقليل الاكل واختصاره من الرجيم كده حتخسى اكتر..بالعكس الجسم حيعرف انك بتجوعيه ويبتدى ما يحرقش علشان يحافظ على نفسه
9- عند ثبات الوزن…. ناخد رجيم دكتوره مها راداميس لثبات الوزن..فعلا وعن تجربه بينهى ثبات الوزن
ولازم نتعود بعد الشهر الاول اننا نغير الرجيم كل اسبوع..
10- الابتعاد عن ادويه التخسيس.كلها مخاطر
11- لو امكانياتك الماديه والاجتماعيه تسمح لك تروحى لدكتور ..اوعى تترددى.حيساعدك كتير.وحيوفر عليكى التفكيرفى الرجيم واختياره.وكمان حيعرف ما يخليش وزنك يثبت لفترات طويله
12- زى حالاتى وما تقدريش تروحى لدكتور لاى سبب من الاسباب..اوعى تياسى وتقولى ما فيش فايده..انا خسيت 50 كيلو من غير دكتور..صحيح اخدت وقت اطول شويه..لكن قدرت ووصلت الحمد لله
13-تقدرى تروحى لجيم فاهم وعارف تمارين التخسيس..ما تتردديش .روحى
مش حتقدرى؟؟ يبقى المشى احسن رياضه ..والرقص..مافيش اى حجه ..امشى فى البيت..ربع ساعه الصبح وربع ساعه باليل
14- فى العزومات اوعى تجاملى حد على حساب نفسك او صحتك..مش عايزه حد يعرف انك عامله رجيم.؟؟.ركزى على اللحوم والسلطه .
.خلاص بقى اتدبستى ولازم حتاكلى اكل خطر على الرجيم..خلى فطارك فاكهه صنف واحد فقط…وكلى اقل شىء تقدرى تاكليه فى العزومه ..وعشاكى يكون فاكهه نفس صنف الافطار..واعملى حسابك ما فيش فرى الاسبوع ده..وزودى الرياضه شويه
15- طبعا احنا بشر..حتيجى فتره ونضعف..ماما عامله اكله تجنن..مش عارفه مين منكد عليا وغصب عنى اكلت..والندم حيموتنى
نووووووووووو..كده غلط.. خلاص اكلتى..مش نهايه العالم..كملى الرجيم عادى..ولا كان حاجه حصلت((طب واللى اكلته)) ارقص نصف ساعه ..امشى ساعه ..حتحرقى اللى عكيتيه
المهم مهما عكيتى اوعى توقفى الرجيم..لان حتلاقى نفسك بتبعدى جامد جدا عن الرجيم وترجعى اضعاف اللى نزلتيه
العك ده شىء بديهى فى الاول وحتى فى النصف.وحتى فى اخر الرجيم..احنا بشر..واى خطء ممكن علاجه..المهم اعملى حسابك ان الرجيم ماشى مهما كانت الظروف..واى غلطه تتعالج..ارقصى..اتمشى..احرقى الاكل الزياده (يعنى لو اكلتى مثلا 600 سعر زياده عن المقرر ليكى))احرقيهم على يومين((يعنى اعملى رياضه اليومين الضعف))واوعى احساس الندم يتملكك..حتاكلى اكتر واكتر
حبى نفسك وسامحيها..وعاقبيها عقاب يمشى مع مصلحتك وصحتك..
بالرياضه
- تجارب رجيم
- تجارب ريجيم ناجحة
- تجارب رجيم ناجحة
- تجارب الرجيم الناجحة
- تجارب ريجيم ناجحة جدا
- تجارب رجيم ناجحه
- قصص رجيم ناجحة بالصور
- أحلى رجيم
- صور تجارب حمية الساعتين
