الشاتوه ده اول كيك قابلنى على النت زماااان… بصراحه دورت على اصله كتير ما لاقيتش شكله اختراع مصرى هو سهل جدا واسهل حاجه فيه ان مقاديره ممكن تحفظيها كوبايه من كله وانه فى كله فى الخلاط
والاسهل بقى انها كيكه منها فيها يعنى بتزوقيها منها مش بتحتاجى تعملى حاجه غيره
هى المفروض بالكاكاو انا غيرت كتييييييير ممكن بدل ماتعمليها بالكاكاو تحطى بداله كيس جيلى مثلا فراوله وتحطيها بدل الكاكاو وممكن تزودى لون احمر يدعمها اكتر
ممكن طبعا اى نوع جيلى انا بقولك على اللى استخدمته
ممكن برده تبدلى الكاكاو باللبن البودره وتبقى كيكه عاديه مش بالكاكاو يعنى مخمخى زى ماتحبى
المقادير:
كوب زيت
كوب سكر
كوب لبن(او كوب لبن مع معلقتين لبن بودره )
نصف كوب كاكاو خااااااام من عند العطار مش نسكويك
كوب دقيق
2بيضه
معلقه صغيره فانيليا
معلقه كبيره بيكنج بودر
الطريقه بقى :
فى الخلاط حطى اللبن مع السكر والكاكاو وانزلى بالزيت سرسوب خفيف لحد ماتلاقى الصوص تقل ناخد من الخليط ده كوب ونشيله على جنب
وبعدين نضيف على باقى الخليط البيض والفانيليا
وبعدين فى بوله ننخل الدقيق مع البيكنج بودر ونضع الخليط عليه ونقلبه ثم يوضع فى صينيه مقاس 22 مدهونه ومبطنه بالدقيق فرن يكون سخن تقريبا 180 بتاخد من 20 دقيقه لنصف ساعه
واول ماتخرج نضع عليها نصف كوب الصوص ونتركها تبرد ثم نضع الباقى ممكن تحطيها فى الثلاجه الصوص هايتقل عن كده شويه او قطعى كده وكلى
