المقادير
1/2 ك مكرونه صغيره
1/2 ك ارز مصرى
1/4 ك شعريه
1/4 ك عدس بجبه
1/4 ك حمص الشام
3/4 كيلو طماطم
2 بصله كبيره
راس ثوم كبيره مفرومه
معلقه زيت
خل / ملح / كمون / ليمونه
الطريقه
اول حاجه بعملها بنقع الحمص من قبلها بيوم عشان تسويته تبقى سهله
بعد كده بحطه عالنار ولما الميه تغلى وهيدخل فى السوى بحط 1/2 كوبايه عصير طماطم ومعلقه ثوم مفروم وملح وكمون وليمونه عشان يطلع زى حمص الشام بتاع بره
تانى حاجه المكرونه
هنسلق المكرونه فى ميه مغليه ونضيفلها معلقه ملح كبيره اثناء السليق
بعدها هنصفيها ونغسلها غسله بسيطه ونحط عليها معلقه زيت صغيره ونقلبها كويس ونسيبها
زى كده
نيجى للرز
هنغسل الرز كويس ونحمر الشعريه وعليها الرز لحد ما يسخنو كويس اوى بعدها نضيف الملح والميه المغليه ونسيبه يغلى لحد ما يتشرب
بعدها نوطى النار عليه ونسيبه يستوى براحته
على فكره انا بعمل رز الكشرى بزيت العباد او زيت الذره عشان يلمع ويبقى خفيف
العدس
هنغسل العدس كويس وعالنار هنحطه يتسلق وزى الحمص هنحطله ملح وكمون
اول ما يستوى بصفيه من الميه بتاعته عشان لو فضل فيها بيتهرى وبيستوى زياده
البصل او التقليه
هنقط بصلتين كبااااااااااار شرايح رفيعه ولو عندك ماكينه الشيبسى يبقى تمام اوى و لو معندكيش قطعيه بسكينه حاميه على لوح التقطيع
هنحمره فى زيت غزير لحد ما توصلى للون اللى بتحبيه
بعد كده خدى بالك عشان يطلع مقرمش ومش شارب زيت
هنصفيه كويس جدااااااااا من الزيت بتاعه ونحط تحته حاجه تشرب اى بواقى للزيت (مندايل المطبخ او ورقه بيضا) ولما يبرد حطى عليه برضه رشه بسيطه ملح وكمون وشيليه من الورقه او المنديل فى طبق تانى نضيف
واخيرا الصلصه
هنضرب الطماطم فى الخلاط بعد ما غسلناها كويس وعالنار الحله فيها زيت عباد او ذره ونحمر فيها الثوم ولما يصفر لونه هنضيفله الخل ويغلى بسيط بعدها هنحط الطماطم ومعلقه كبيره صلصه (ممكن الاستغناء عنها) لحد ما تتسبك
بعدها هنغرف وتاكلى احلى كشرى واحلى من بتاع بره واضمن فى نضافته كمان
