انا كنت بعد الولاده بكرش فظيع طبعا زى ماحضراتكم شايفين
بالعكس ده انا صورت الصوره دى بعد ما كنت خسيت شويه
كنت 89 كيلوا وانا طويله اصلا يعنى 173 سم
والوقتى 78 كيلو ومازلت طويله برده
نبتدى بقى بسم الله فى الخطوات بس انا هعملها على هيئه اسئله
1. اخس ليه انا مش طخينه قوى ؟؟ انا بلبس XL يعنى مش طخينه ولا حاجه ؟؟
ايوه حبيبتى مقاسك كده مش تخين قوى بس انتى عارفه
ان المقاس تقريبا 10 كيلوا زياده عن الوزن الطبيعى
يعنى تخيلى ان انتى دايما ماشيه وشايله طفل على ايدك عمره سنه ونصف (وزنه تقريبا 10 كيلوا )
تفتكرى ايه اللى هيحصلك
طبعا ظهرك هيوجعك ورجلك هتوجعك وكل حته فى جسمك هتشتكى من التقل ده
وده اللى بيحصل ونرجع نقول ظهرنا بيوجعنا ليه بعد الولاده
ثانيا : فرق شنيع جدا فى اللبس
انتى عارفه انا محستهاش الا الوقتى
تعرفى تلبسى كل حاجه براحتك بناطيل جينز براحتك ( فى البيت طبعا ) وقمصان نوم كب وكل اللى نفسك فيه
بتحسى اصلا ان معامله جوزك نفسها اتغيرت
ثالثا : خليكى ام زى العسل
نشيطه وجميله تبقى قدوره لاولادك
طيب اخس ازاى ؟؟ اوعى تقولى لى بيضه الصبح وبيضتين الظهر ؟
الناس اللى بتعمل رجيم قاسى دول حرام عليهم نفسهم
لان مستحييييييييييييل تعيشى طول عمرك كده
يعنى ايه بيضه الصبح وربع رغيف … ده انتم بتهزروا
نبتدى بالفطار
افطرى كل اللى نفسك فيه
كلى جبنه مثلا ( بس كلى القريش ) لو ما بتحبيهاش كلى الجبنه البيضاء بس بلاش المالحه وبلاش الرومى
كلى فول ( انتى اللى تعمليه ) او هاتيه جاهز ماشى …. بس ما تعميلهوش بقى بحته سمنه والجو ده … حطى عليه شزيه زيت زيتون على الوش هيبقى جنان
كلى بيض ( بلاش اومليت ) خليه مسلوق احسن …. او اومليت بزيت زيتون
كلى بطاطس ( ما تقليهاش ) اسلقيها وقطعى عليها عود بقدونس وقرن فلفل هتبقى تحفه , او قطعيها صوابع واقليها فى نقطه زيت ذره او حتى من بتاع التموين وهدى عليها وغطيها على ما تستوى وهيبقى فيها طعم القلى و كمان من غير زيت
كلى طعميه ( بس اقليها فى بيتك ) نقطه زيت صغيره وهدى عليها
كلى برنجان ( برده بلاش مقلى ) حطيه فى طاسه وهو مقفول ونقطه زيت وهدى عليها هتلاقيه اتفتح لوحده وطعمه وريحته جنان
خياره كده جميله على الفطار وشويه جرجير وطماطمايه وفلفل يبقى فطار زى الفل
بالنسبه بقى للعيش
هاتى اكبر رغيف عيش فى الكيس كله
وكلى كل الاكل اللى على الصينيه يعنى لو طعميه كليها وجبنه وبيض كلى كل اللى على الصينيه كده حاف وبعد ما تخلصيه كلى العيش
لو خلصتى كل اللى على الصينيه هتلاقيكى بتسيبى حبه صغيرين تغمسى بيهم بس الرغيف
هتخلصى الرغيف وهتكونى شبعتى
واقسمى الرغيف بالطول قبل ما تاكليه هتحسى كانه اتنين
طبعا الرغيف ده للناس اللى متعوده تاكل اكتر من كده واللى متعوده على الرغيف يبقى تقلل عنه شويه
ولما تقسمى نصف الرغيف اقسميه بالطول يعنى كانك بتفتحيه كده مش بالعرض هتحسى انها حته صغيره قوى
ملحوظه
اى حاجه نفسك تفطرى بيها افطرى بيها
المهم
مايكونش فيها زيت ولا مكرونه ولا معجنات طبعا
طب ايه اللى ما ينفعش اكله فى الفطار ؟؟؟
ما ينفعش مثلا تروحى تجيبى حته كيك وكوبايه شاى وتفطرى
لان ده مفيهوش اى غذاء خااااااااااااااالص
بالعكس الكيك عباره عن نشويات كلها والشاى ما فيهوش اى نوع من انواع الغذاء
ما ينفعش برده حته جلاش او كنافه او اى حاجه من هذا القبيل
اسالى نفسك الاول ده فيه غذاء ؟؟ لو لاء يبقى مش هيجيب اى نتيجه بالعكس هيزودك على الفاضى
بصوا هو الموضوع كبير جدااااااااااااااااا
لو شجعتونى هكمل وكفايه النهارده الفطار ونكمل بعدين
رجعنا لكم تانى
شويه اسئله على الماشى اولا عشان نجاوب على الاستفسارات
زيت الزيتون مشبع بالدهون ؟؟
صح … زيت الزيتون مشبع بالدهون مش بس زيت الزيتون كل انواع المكسرات والاسماك
بس دى دهون مفيده للجسم
حد سمع قبل كده عن كوليسترول ضار واخر نافع ؟
هو ده اللى الجسم بيحتاجه يعنى حتى لو كانت سعرات حراريه زياده فمفيش منه اى خوف لانه صحى جدا
لكن منختلفش طبعا ان زيت الزيتون يفضل على البارد ويفضل فى الطبخ زيت دوار الشمس
انتى بتتكلمى عن التخسيس عامه ؟؟ فين تخسيس البطن ؟؟
انا اقولك الجسم شغال ازاى
انتى بتاكلى …. الجسم بياخد طاقه … لو عملتى مجهود يبقى الجسم بيحرق طاقه
لو مجهودك ده استنفز كل الاكل يبقى مش هتتخنى
لو المجهود اقل من الاكل يبقى هتتخنى … وكل جسم وله نظام
يعنى فى ناس بتتخن كلها على بعضها ودى ربنا مبارك لهم
وفى ناس بتتخن من الجناب بس ؟؟ او البطن بس ؟؟ او حتى الوراك ودى ماساه
لو المجهود اكتر من الاكل ؟؟ يبقى زى الفل هتخسى تمااااااااااام
لان الجسم هيضطر يدور على مخزون الدهون ويقوله معلش يا عم الحج احنا محتاجين نحرق
شويه دهون عشان الراجل ده عاوز طاقه
فيشوف بقى
اول حاجه يا عينى تخس … هى وشك
لان دى اسهل دهون ممكن تتحرق
بعد كده للاسف برده … سدرك
بعد كده بطنك وجنابك ثم اوراكك وفى الاخر خااااااااالص الارداف
بالنسبه بقى لسؤالنا
فمفيش حاجه اسمها تخسيس البطن لوحدها
انتى لازم تعملى رجيم وبالتالى الجسم هيحرق من البطن
اللهم الا لو عاوزه يبقى تعملى لك كده كل يوم نصف ساعه تمارين بطن تشد لك العضله ومنها بقى
تحرق لك السعرات الحراريه اللى حولين عضلات البطن
ونسيت اقولك ان انتى ممكن تعملى تمارين نصف ساعه تحرقى بيهم طبق محشى مسبك
يعنى انتى بكرامتك لا كنتى تاكلى المحشى ولا تهدى فى نفسك
فالرجيم اسرع وافضل
- الحقوني عاوزه اخس بعد الولادة
- خسيت من الجريب فروت
