فتيح المناطق الحساسه
فيه عيانين كتير بيشتكوا من اسمرار المناطق الحساسه زي الرقبه- تحت الابطين- تحت الصدر- بين الافخاذ. و غالبا المشكله دي بتبقى بقالها مده طويله و غالبا بيبقوا عايزين يفتحوها في مده قصيره اوي ( مشكله بقالها سنين مبتروحش مره واحده يا قلبي انا)
تعالوا ناخد الموضوع واحده واحده عشان في عك كتير ….. ياللا نقول
1- اسباب اسمرار المناطق الحساسه:
– زياده الوزن و دي بتبقى سبب اساسي في اسمرار منطقه الرقبه ( ييجي عيانين يقولوا رقبتي اغمق من جسمي اقولها خسي تقوللي اكتبي على كريم… الكريم مش هو الحل في المنطقه دي الحل نخس و ساعتها غالبا حتلاقي الاسمرار ده اتحسن بنسبه كبيره جدا ان شاء الله،) كمان الوزن الزائد بيبقى عامل مساعد في اسمرار تحت الابطين و بين الافخاذ.
– الالتهابات: عزيزتي مدمنه الكيناكومب و الفيوسيكورت والبيتاديرم وال … و ال…. اللي بتستخدميه على الفاضيه و المليان بسبب و من غير سبب مش معنى ان الوجع هدي تبقي حضرتك كده عالجتي الالتهاب انما الكورتيزون اللي في الكيناكومب او الفيوسيكورت هو اللي ضيع الوجع لكن لم يعالج العامل الفطري او البكتيري الذي يؤدي في النهايه لاسمرار المنطقه. يجب استشاره طبيب جلديه لتحديد نوع الالتهاب و العلاج المناسب .
– طرق ازاله الشعر المختلفه: في ناس عندها حساسيه من الليمون اللي في السويت ، او من الكريم و اسواهم الشمع اي والله . كمان في ناس بيطلعلها حبوب بعد السويت او السيلكابيل و دي بتسيب مكانها بقع و تؤدي لاسمرار المنطقه ( تسالي الحل ايه اقولك ليزر لان ليزر ازاله الشعر بيضعف بصيله الشعر و لون البصيله بيدي للجلد درجه غامقه و لما البصيله بتضعف لونها بيفتح فالجلد بيفتح)
– مزيلات العرق: فيه اشخاص بيبقى عندهم حساسيه ضد نوع معين من مزيل العرق و فيه انواع اللي بتلاقيهم ملهمش ماركه دول و بتبقى ريحتهم قويه و ماركتهم مجهوله بصراحه الانواع دي بتبقى نسبه الكحول و الروائح المهيجه للجلد كبيره فحاولي تبعدي عنها ، موضوع الشبه ده طالما مش مخلوط برائحه مفيش منه مشكله. الناس اللي عندهم مشكله تعرق زائد فيه دلوقتي حقن بوتوكس بيعالج المشكله دي و فيه ادويه بتقلل النشاط الزايد للغدد العرقيه
– الاحتكاك: احتكاك الافخاذ ببعضها او تحت الابطين وقت الحركه بيؤدي الى قيام الجسم بعمل طبقات سميكه من الجلد الميت للحمايه من الاحتكاك المتكرر ركزي بقى في النقطه دي كويس اوي عشان حضرتك بتعملي مصيبه عشان مفكره انك كده بتعالجي و في الحقيقه انتي بتزودي الاسمرار و انتي مش عارفه.
2- التعامل الخاطئ مع المناطق الحساسه:
– الاستخدام المفرط لكريمات طبيه غير معروف اضرارها لمجرد ان مكتوب عليها مضاد للالتهابات
– استخدام اللوفه او كريمات السنفره او الحمام المغربي و ان حضرتك تتوصي و تفضلي تدعكي فيها جامد لاقتناع خاطئ من حضرتك ان اللون حيفتح و على العكس جسم حضرتك بيقابل الاحتكاك ده بطبقات جلد ميت ازيد و في وقت اسرع ( مش مصدقه كلامي؟؟؟ اللي متعوده تعمل حمام مغربي على جسمها بصفه منتظمه و اتاخلرت في مره عن معادها بتلاقي جلدها بقى ازيد و اخشن)
– لبس البادي الليكرا سواء كارينا او غيره لا يمتص العرق مم يتسبب في زياده نسبه الالتهابات
– استخدام كريم تفتيح صاحبتك قالتلك عليه ولا ميلتي على الصيدليه و قولتيله ناولني احسن كريم تفتيح عندك وصلحو،( لكل واحده استخدمت كريم ليكوسيد ار في المناطق الحساسه احب اقولك حسابك عند اللي خلقك يا بعيده) مش كل كريمات التفتيح تنفع للمنطقه الحساسه و لا كل كريم اتكتب لمريضه ينفع تباصيه لصاحبتها زي ما تكون بتعزم عليها
– استخدام سكرب التفتيح للمناطق الحساسه اللي جبتيه من على النت او من الكوافيرات بتاع الليمون و زيت الزيتون و الملح ……………………. واحده عملت كده و اتعرضت للشمس بعديها و بعيد عنكم سواد ما بعده سواد ( صبرني يا رب)
3- كيفيه علاج المناطق الغامقه:
– لو فيه التهابات عليكي و على الدكتور عشان تاخدي كورس علاج كامل و تلتزمي بيه لاخره
– عمل جلسات تقشير كيميائي امن للمناطق الحساسه عشان نشيل طبقه من الجلد الميت و نقدر نستخدم بين الجلسات كريمات تفتيح للتعجيل من النتيجه المرجوه
– كريمات التفتيح لازم يتم اختيارها بعنايه من قبل الطبيب لان استخدام كريم قوي اوي ممكن يحرقك لان المناطق دي الجلد فيها حساس اوي و لو استخدمتي كريم ضعيف حتزهقي و مش حيجيب نتيجه انما عمل جلسات تقشير للمناطق دي مع كريمات متوسطه القوه نبقى حنجيب نتيجه كويسه بامر الله
– مفيش ليزر تفتيح بيتعمل في المناطق دي يا ظلمه……. ليزر الفراكشنال او السنفره او التفتيح لا يجب استخدامه على المناطق الحساسه اطلاااااااااقا و لو تم استخدامه حيبقى باضعف الجرعات حتى لا يتم حرق المريضه و يبقى في الحاله دي التقشير احسن كتييييييييير و الوميض الضؤيي نتيجته متواضعه اوي في الموضوع ده
– حقن الجلوتاثيون اللي بيوحد لون البشره ما هو الا اشاعه كبييييييييييره الحقن ده بيدي نضاره و حيويه للبشره فقط لاغير لكن لو استخدمتيه عشان يوحد لون جسمك يبقى يحييني و يحييكي( و الله لو فردتيه على السندوتشات و اكلتيه مش حيوحد لون حاجه)
– ليزر ازاله الشعر يساعد على تفتيح منطقه تحت الابطين و بين الافخاذ بدرجه كبيره
– حقن البوتوكس لعلاج التعرق الزائد
4- الوقايه من اسمرار المناطق الغامقه:
– ارتداء بديهات و شورتات قطنيه لامتصاص العرق و لمنع الاحتكاك
– استخدام مزيل عرق لا يسبب تهيج للجلد و اذا تم استخدام مزيل العرق مرتين او تلاته في اليوم يجب غسيل المكان بماء و صابون مناسب لنوع بشرتك قبل كل مره
– البعد عن الماسكات و السكرب و الافراط في استخدامها
– عدم الافراط في عمل الحمام المغربي لمنع نصنيع الجلد الميت بشكل اسرع
اخيرا و ليس باخرا ………….
عمليه تفتيح هذه المناطق يتطلب وقت يعني يا حلوه متجيليش و تقولي فرحي كمان اسبوع ،اتقي الله يا ظالمه. الموضوع بيتعالج بس بياخد وقت و لازم نتفادى الاسباب الغلط اللي بنعملها و بلااااااااااااااااااااش فتي في اللي ملناش فيه. عارفه اني رغيت كتير بس قالولي ان الاقبال كان تاريخي على الموضوع ده ( مع اني كنت حقول كلام كبير برضو في موضوع العنايه بالبشره بس ياللا مفيش نصيب ؛) )
الى كل واحده قاعده تبص على اللي في التليفزيون و بيقولوا امال تحت باطهم ابيض كده ازاي ؟؟؟؟؟ بلاش حقد يا قلبي تحت باطهم غامق والله بس بيعملوا حاجه اسمها اير برش حاجه كده زي الفونداشين على الجسم لو مش مصدقاني اتفرجي على روبي في اغنيه انت عارف ليه ؟؟؟ مكنتش لسه جابته و السواد اللي كان تحت باطها كان مبالغ في اداؤه….. بعد كده ربنا فتح عليها و جابت عجله
يا رب يكون الكلام مفيد وان شاء الله نتقابل الاسبوع اللي جاي في موضوع تاني من اختيار حضراتكم برضو
دكتوره ساره ابراهيم زكي
