وصفات من المطبخ المغربي
طريقه المقلوبه بالدجاج
ناخد الدجاج ونضيف البصله شنايف رقاق والزيت الروميه و البلديه + ملح + ابزار+ كامون + تحميره + سكنجبير+ خرقوم بلدي + زعفران حر+ راس الحانوت د المروزيه + شوي د مطيشه د الحك + معدنوس
نشحرو الكل ونرويو وفاش يطيب الدجاج نزولوه ونتركوه يبرد ونخليو المرق حتى يختار مزيان كيف الصوره
ونرجعو ناخد الفلفه ونشويوها ونقطعوها مربعات صغار ونشحروها فالزيت البلديه شوي كامون وملح حتى تنشف من الماءوناخد البطاطا ونقطعوها دوائر ونقليوها (والا كان الدنجال نقشروه ونقطعوه طرونش صغار و رقاق ونقليوه)
ثم ناخد الروز (لكل كاس روز كاس ونصف ماء) +زيت روميه +ملح+ابزار+زعفران حر+شوي راس الحانوت+قبصه قرفه ونخليو الروز حتى يطيب ينشف ونرجعو نقليو الدجاج اوندهنوه بالزبده وندخلوه للفرن ثم ناخد انيه غارقه ونغلفوها بالالمنيوم ونستفو فيها الدجاج والفلفه والبطاطا وحتى الدنجال الا درتيه ونغطيو بنصف الكميه د الروز ونعاودو نستفو الخضار ونفرقو لاصوص د الدجاج بالمعلقه ونغطيو بالنصف الاخر د الروز ونقلبوه في طبق التقديم ونرشو باللوز ايفلي محمر الا بغيتي وتقدميها مع سلطه
