مكرونه بشاميل بالخضار بدون لحم
نص كيس مكرونه فرن مسلوقه (طبعا ممكن تزودي الكميه براحتك)
طماطم قطع صغير
فلفل اخضر قطع صغير
زيتون مخلي مقطع
البشاميل
5 معالق دقيق
حته زبده كبيره
مكعب مرق (ممكن اللي مش بيحبوه يستبدلوها بكوبايه شوربه )
3 كوبايات لبن وكوبايه ميه
ملح
فلفل
رشه جنزبيل بودر
رشه قرفه بودر
نص معلقه صلصه
انا دايما بجيب البشاميل الجاهز بس المره دي حبيت اجرب البيتي وطلع رائع جداااا وطعمه حلو اوي
الطريقه
نخلط المكرونه مع الخضار
نبتدي نجهز البشاميل
نجيب حله ونحط فيها حته الزبده والدقيق ونقلب كويس ويدوب الدقيق يصفر
تحطي اللبن والميه وتقلبي كويس جدا لحد ما الدقيق يمتزج فيهم
بعد كده نضيف مكعب المرق والملح والفلفل والجنزبيل والقرفه
ونقلب كويس جدا علي نار هاديه لحد ما البشاميل يتقل
انا مش بحب البشاميل يبقي تقيل اوي بحبه معقول عشان بيبقي كريمي وحلو اوي لما المكرونه تستوي
بعد ما يتقل البشاميل بضيف له نص معلقه صلصه بتدي لون ونكهه جميله
كده يكون البشاميل جاهز
بجيب الصنيه واحط فيها شويه بشاميل واضيف عليهم المكرونه والخضار وافردها كويس في الصنيه
بعدين بصب البشاميل علي المكرونه واساويه بحيث يغطي السطح كله
وممكن تضيفي جبنه موتزاريلا او تركي وممكن لا
انا المره دي ما ضفتش حاجه
وتدخليها الفرن لحد ما تتمساك والخضار تستوي يعني ربع ساعه او تلت ساعه حسب الفرن بتاعك
وبعدين بولع الشوايه عشان تاخد الوش الجراتان الجميل
ده الشكل النهائي
- معكرونة بالبشاميل بدون لحمة
