الحمام العطري للعروسة

ازيكم يا احلى بنات و عرايس فى الدنيا
انا انشاء الله هتجوز فى شهر 4 و مش هجيب حد يعملى ولا سويت ولا حمام مغربى و لا حمام عطرى ولا الحاجات دى انا هتصرف مع نفسى انشاء الله عشان مقدرش اتكشف قدام اى حد و كمان حرام ربنا يقدرنى
فى كتير منكم ميعرفوش الحمام العطرى بيتعمل ازاى و بيكتفوا بالحمام المغربى و خلاص للعروسه لكن انا شايفه ان خطوه الحمام العطرى دى مهمه جدا جدا و كمان توقيت عمله مهم برده هو عادتا بيكون بعد السويت و الحمام المغربى بس فى ناس بتعمل الحمام المغربى و السويت مثلا قبل الفرح بيومين عشان هتعمل ليله حنه و كده فى الحاله دى مفضلش تعمل حمام عطرى عشان هيبقى فاضل يومين و تاثيره هيروح او هيقل يبقى افضل لو تعملوه يوم الفرح الصبح و خصوصا انه سهل و مش محتاج وقت و ناس هتعمل حمام مغربى و سويت قبل الفرح بيوم فى الحاله دى ممكن تعمل حمام عطرى بعديه مباشرتا و لو انى افضل فى كل الاحوال ان العروسه تعملوه الصبح قبل ما تروح للكوافير كده كده هتاخد دوش كويس اول ما تصحى
نيجى بقى للادواتالحاجات الى هتحتاجيها
شور جل ريحته حلوه زى مثلا دوف او لوكس او شاورات ايفون و اورفيلام اى حاجه بترتحيلها
مكعب مسك من العطار بحوالى 5 جنيه
ماء ورد اى نوع ايفا او اى نوع تانى من الصيدليه او من عند العطار كله يمشى
زيوت عطريه 10 مل الى تفضليه ممكن زيت ياسمين او لافندر او مسك او اى زيت لبرفان بتحبيه كاسيليا اورجانزا نينا ريتشى روحى عند العطار و شمى براحتك و هاتى 10 مل من النوع الى تحبيه هيكون من 5 ل 10 جنيه مش هيزيد عن كده عايزه تجيبى كذا نوع و تعملى مكس زبوت عطريه براحتك
علبه بيبى اويل جونسون الصغيره الى بالزهور رائعه و الى بالكموميل رائعه برضوه اى حاجه حسب رغبتك
بودره معطره للجسم فى نوعين انا افضل الاول الى هو انشانتر رائعه جدااااااااا احلى لونين الموف و الاحمر انا حبيت الاحمر اكتر وتانى نوع بودره جونسون بالكموميل حلوه برده بس انشانتر احلى

كده انا خلصت الادوات نيجى بقى على الطريقه

نغسل جسمنا بالشاور جل الى نحبه و بعدين
تملى البانيو ميه دافيه و تحطى فيها حوالى 5 مل من الزيت العطرى الى جبتيه و نبشر فى الميه حوالى نص حجر المسك هيدوب فى الميه و هيدى ريحه تحفه اقعدى فيه حوالى نص ساعه لو عايزه اكتر اقعدى لو عندك وقت لكن اهم حاجه ميقلش عن نص ساعه وبعد كده اطلعى من الميه و اقفى دقيقتين الميه تتصفى من جسمك و متنشفيش خلى جسمك رطب اخلطى نص ازازه البيبى اويل مع معلقتين كبار ميه ورد و باقى زجاجه الزيت العطرى ال 5 مل المتبقين و رجى كويس و على جسمك الرطب لفى جسمك كله بالخليط و اهتمى بالثنايا وبعد ما تخلصى استنى 5 دقايق جسمك يتشرب الزيوت واخر خطوه البودره المعطره رشى جسمك كله منها و اهتمى بالثنايا و منطقه السره و البسى و اطلعى هيثبت فيكى ريحه العطور من 5 ايام لاسبوع بجد وهمى و تحفه و مجرب