خلطة الكبدة الاسكندراني

خلطه الكبده الاسكندراني

السلام عليكم ورحمه الله وبركاته النهارده ان شاء الله هقدملكم كبده اسكندراني احلي مليوون مره من بتاعه بره :)) يالا نبدا:
المقادير:
-نصف كيلو كبده بقري مقطعه تقطيعه الشاورما
-عدد 6 فصوص ثوم
-فلفل حار حسب الرغبه(انا استخدمت 5 قرون الصغيرين اووي)
-فلفل رومي(انا استخدمت نصف حبه)
-معلقه شاي ملح
-ربع معلقه فلفل اسود
-معلقه شاي ممتلئه كمون
-ليمونه
-مقدار غطاء خل
-زيت

ديه صوره الكبده هنحطها في مصفاه ونحط عليها ليمون ونشطفها بسيط بالماء انا بملي كوبايه ميه وادلقها عليها وهي بالمصفاه متحولوش تغسلوها اكتر من كده عشان متشدش في الاكل وتفقد قيمتها

الطريقه:
-هبشر الثوم واقطع الفلفل الحار حلقات صغيره جداااا واحطهم في طبق واحط عليهم الملح والفلفل والكمون و الخل والليمون

واقطع الفلفل الاخضر الرومي شرائح

نسخن طاسه علي النار تيفال او اي نوع ميلزقش نسخنها كويس جدااااا ونحط فيها زيت معلقتين اكل كده ولمي تسخن كويس انزل بالكبده بس ملاحظه مهمه جدا اننا مش نملي الطاسه عشان الكبده متنزلش ميتها وتبقي مش حلوه انا قسمتهم علي طاستين او ممكن تعملوهم في نفس الطاسه دفعتين
ننزل بالكبده نقلبها تقليبتين بس تغير لونها واشيلها واحط الدفعه الثانيه اقلبها تقليبتين برضو تغير لونها وبعدين احط الدفعتين علي بعض يارب تكونو فهمتوني

بعد كده انزل بنصف الخلطه اللي عملتها من شويه فاكرينها اللي هي الثوم والفلفل الحار والملح والفلفل والكمون والليمون والخل انزل بنصها بس واسيب النصف الثاني زي ماهو

واقلب الكبده واغطيها واسيبها عشر دقايق تاخد وتدي مع نفسها

بعد عشر دقايق هفتح علي الكبده احط النصف الثاني من خلطه الثوم والفلفل الحار واقلب وبعدين احط الفلفل الاخضر المقطع شرائح ومغطيش عليها واسيبها دقايق تكمل سواها بالكتير 5 دقائق او اقل عشان الصوص الجميل اللي بالكبده مينشفش والصوص ده هنستخدمو في الساندوتشات بيكووون تحححفه

-ودوقوا احلي طبق كبده اسكندراني

ولو عاوزين تعملوها ساندوتشات هاتو الخبز اللي عاملينو بالبيت طبعا ونحط عليها طحينه وطماطم وخص وكبده وبعدين نحط شويه من صوص الكبده وشويه من البيبر صوص اللي هو صوص الفلفل الاحمر ده بيكون حامي اوي او ممكن تستغنو عنو وتلفو الساندويتش وبيتقدم مع خيار مخلل وبجد هتدوقوا ساندويتش كبده احلي وانضف من بره بمراااحل وبالهنا والشفا

وده زوووم علي الساندويتش

-والي اللقاء في موضوع اخرباذن الله :) في امان الله

• خلطه الكبده الاسكندراني