كنافة عش البلبل

كنافة عش البلبل

المكونات:


نصف كيلو كنافة طرح (واسمها بردو فالمحلات كنافة بورما)


2 كاس سمنة سايحه


كوب و نص سيرب تقيل بارد(السيرب هو الشربات او القطر او الشيرة )


بندق و لوز للحشو(وممكن فستق او اي مكسرات تانية يعني حسب الرغبة )


ملحوظة :المكونات دي علي ربما الصينية اللي انا مصوراها

الكيفية

هنقطع منها جزء صغير

ونلفة علي ايدينا زي كده


شايفين احدث الخصلة اللي قطعناها دي نمسكها بالايد التانية و نشدها و احنا بنلف بس بالتاكيد الايد التانية كنت بصور بيها فعشان كدة الخطوة دي مش ظاهره


لازم نشد بالايد التانية عشان الاساور تبقي ما سكة نفسها و متخافيش مش هتتقطع منك


ومش شرط نلف علي ايدينا يمكن نجيب اي حاجة نلف عليها زي المعلقة الخشب او قلم مثلا اللي يريحنا


ونبدا نرص فالصينية بشكل دائري و نحط فكل و احدة نعملها المكسرات

لغاية ما تخلص الصينية

هنسيبها برة و من غير اي سمنة ليلة كاملة عشان تعضم و تنشف و تكون متماسكه


ولما نيجي نساويها هنحطلها كمية السمنة و هتكون سايحة بس مش سخنة و اللي تفتكر السمنة الكتير لاء هي مش كتير و لا حاجة هي بتتحمر فالسمنة دي فالفرن و كمان لما بنخرجها من الفرن بنصفي السمنة الزيادة و هي اساس سواها كمية السمنة دي و دة من عوامل نجاحها و فية ناس بتحط اكتر ما نا حاطة بكتير


هنا و احنا بنحط عليها السمنة

وهندخلها الفرن علي حرارة عالية (200 مثلا)


دة شكلها فالفرن قبل ما تستوي علي الاخر

ونطلعها لما يبقي لونها ذهبي و بها ناس بتحبها اغمق من اللي عاملاها بس انا شايفة ان كدة معقول


اول ما نطلعها نصفيها من السمنة الزياده


ونحطلها السيرب البارد

وممكن لما تبرد شوية نصفيها من السيرب الزيادة بس علي فكرة يمكن تحطو سيرب اكتر للي بيحب السكر الزيادة فالحلويات


ونقدمها لما تبرد


ودة شكلها

عوامل نجاح الكنافة الاساور:


اولا الكنافة لازم تكون كنافة طرح مينفعش كنافة عاديه


ثانيا لازم تكون طازة جدا جدا لو اتحطت فالهوا نشفت او باتت مش هتنفع


ثالثا و احنا بنشتغل بالكنافة لازم تكون متغطية بقماش مندي يعني مبلول مياة عادية مش ساقعة بس معصور كويس جدااا


رابعا هتسالوني هو النص كيلو عمل صينية و احدة بس هقولكم انا اسبعدت القطع المنعكشة فالكنافة عشان الاساور متبقاش منعكشة معايا لان بالتاكيد علي ما نجيب الكنافة من المحل و نرجع بيها المنزل فية اجزاء منها هتتبهدل و القطع اللي استبعدتها دي فالاخر اخدتهم و قطعتهم و عملت بيهم صينية كنافة عادية بالقشطه


يارب موضوعي البسيط دة يصبح عجبكم

• طريطريقة عش البلبل بالمكسرات