12:37 صباحًا الأربعاء 22 مايو، 2019

طريقة عمل البفتيك اللحمة

 

صور طريقة عمل البفتيك اللحمة
خطوات عمل البفتيك المقلي
المقادير:
-نص كيلو لحم بفتيك
-بصلتين متوسطين مقطعين شرايح
-اربع فصوص ثوم مقطعة شرايح
-نص ليمونه
-مقدار غطاء خل
-معلقة ملح
-ربع معلقة فلفل اسود
-ربع معلقة بابريكا
-ربع معلقة قرفه
-ربع معلقة بهارات لحم
طبعا معالق التوابل بتكون صغيرة اللى هي معالق الشاي
خلطة البانيه:
-بيضتين-نص كوب لبن حليب،رشة ملح و فلفل اسود،بقسماط
ملاحظه:التوابل ممكن تغيريها براحتك حسب المتوفر عندك اهم حاجة و الثابتين الملح و الفلفل الاسود
الطريقه:
-هنغسل اللحم بالمية و نصفية من ميتو

-دية صورة المقادير هنا قطعنا البصل و الثوم شرايح و مش نبشروا و لا ناخد ميتو كدا اسهل لان البصل و الثوم هينزلو ميتهم لوحدهم و بعد كدة هيكون من السهل اننا نشيل اللحم من التتبيلة عشان نقليها

-هنحط مقادير التتبيلة كلها على بعض و نقلبها بايدينا

-نحط التتبيلبة على اللحمة و نقلبهم مع بعض

-نحطهم في كيس و نقفلو كويس و على فكرة الكيس بيسرع التتبيل يعني لو مستعجلة على الحاجة و عاوزاها تتبل بسرعة حطيها في كييس و ندخلها الثلاجة على الاقل ساعتين دة اقل حاجة و كل ما زودتى المدة هيكون احسن عشان اللحمة يبقى طعمها  احسن و اطرى انا سبتها ليلة كامله

-تانى يوم بقى او بعد ساعتين او 4 او حسب ما سبتيها بالتتبيلة هنطلع اللحم و نجهز بقى الطبقة اللى هتلزق اللحم بالبقسماط و هي مقاديرها عبارة عن بيضتين و نص كوب لبن و رشة ملح و رشة فلفل اسود

-هنحط اللبن و البيض و رشة الملح و الفلفل على بعض في طبق

-نقلبهم كويس جدا بالشوكه

-البقسماط بقى انا بستخدم الجاهز دة  بصراحة بيدى نتيجة جمييله،انتو ممكن تستخدمو بقسماط عادي بس لو هتستخدمو بقسماط عادي اخلطوة بحبة دقيق صغيرين

-نحط البقسماط في الطبق و عليه يجى ربع معلقة صغيرة ملح و رشة فلفل اسود و زي ما اتفقنا لو هنستخدم البقسماط السايب حطولوة حبة دقيق صغيرين و معاة ملح و فلفل اسود و ممكن بقى حبة توابل من اللى حطتوها على اللحم بس انا بستخدم البقسماط الجاهز دة و بكتفى بتتبيلة بملح و فلفل اسود فقط

-هقلب البقسماط في بعضه

-هنا كل حاجة عندنا بقت جاهزة البقسماط و البيض المخلوط بللبن و اللحمة المتبلة  نبدا بقى الشغل ))

-هننشل اللحم من التتبيلة و هتلقيها بتتشال بسهولة جدا من اللتتبيلة لاننا مقطعين البصل و الثوم شرايح و هحط اللحم في خليط البيض و اللبن

-وهمسكها كدة زي الصورة عشان تنزل البيض و اللبن الزايد

-وبعدين هحط اللحم في خليط البقسماط

-واقلب اللحم على الناحية التانيه

-والخطوة المهمة هما اني اضغط على اللحم كويس قوي قوى عشان مش تفك منى بالقلية و احطها بين ايدى الاتنين كانى بسقف عليها  وهنا اما  ضغطها كويس

-هنا خلصت الكمية كلها

-هنا بقى غلفتو و عندك حلين لو عاوزة تعملية علطول حطية بالفريزر نص ساعة لو محضراة بدرى و قدامك اكتر من ساعة لحد ما تقلية خلية بالثلاجة ساعتين تلاتة براحتك بقى حطية بالثلاجة و الخطوة دية مهمة اوى انك تحطية بالثلاجة عشان طبقة البقسماط مش تفك اما يتقلى انا حطيتو بالفريزر نص ساعه

-بعد نص ساعة هطلعوا من الفريزر عشان اقلية و مرحلة القلى مهمة جدا برضو في نجاح البفتيك
نحط زيت غزير و نسخنو على نار عالية لازم يسخن كويس و ممكن اختبرو اني احط فيه طرف بفتيك اذا عمل تششش يبقى سخن كويس معملش استنى عليه كمان شوية و اجرب تانى عمل تشش تمام احط البفتيك
هنا حطيت البفتيك

-ااول ما احطوا اخلى النار متوسطه

-اما ياخد لون اقلبو على الناحية التانيه

-مجرد ما ياخد لون من الناحيتين هيكون استوى هطلعوا من الزيت بشوكة او مقصوصه

-نطلعهم على مناديل عشان يمتص الزيت الزايد

-هيكون مقرمش من برة و طرى من جوة و لو حابينو طرى  كلو او حسيتو نفسكم نشفتوة اول ما يطلع  غطوة بورق الومنيوم هيطري
ويقدم بالف هنا و شفا ))

192 views

طريقة عمل البفتيك اللحمة