اليوم قررت نحط ليكم الصور ديال البسطلية لى عملت و قبلوا على اختكم يالله مبتدئة
علي بركة الله
المقادير
دجاجة مقطعة + التوابل كاملة الا التحميرة + الزعفران + الكاوكاو مهرمش + 8 البيضات + و رقة البسطيلة + كيلو البصلة مقطعة + السكر سقيل و القرفة للتزيين و 3 معالق زبدة مدابة
نخليكم مع الصور
الدجاج طايب مع العطرية و الزيت و البصله
نزولوا الدجاج من المرق باش يتسقطر و ينشف تماما
البصلة لى بقات لينا فالطنجرة نضيفوا عليها 8 البيضات و نخليوها حتي تنشف مزيان من المرق لى فيها
نمروا للدجاج و نقيوة مزيان من العظام لى فيه
نوجدوا و رقة البسطيلة ، انا عملتها غير فالدار ، المقادير هما الدقيق و شوية الملح و العجينة كتكون بحال ديال البغرير و نعملوها فمقلاة طيفال مباشرة فوق نار مهييييلة بزاف او عملى حمام ما ريا و حطى فوقو المقلاة كلتا الطريقتين تينجحوا
المرق ملى ينشف مزيان نوضعوة حتي هو فمصفاة يتسقطر الا بقات فية شى حاجة بعدها نضيفوا علية السكر سقيل جهد 4 ملاعقكبيرة و نوضعوة جانبا
نهرمشوا الكاوكاو و نضيفوا لية حتي هو معلقة كبار سكر سقيل و شوية من البصلة لى عملنا باش يعقاد شوية لانة تيصبح مفرق و البصل غادى يجمعوا شوية
ناخدو المول ديال البسطيلة و نفرشوا الورقة و ندهنوها بالزبدة و نفرشوا التفريشة الاولي لى هى الدجاج
و نوضوعوا فوقوا الورقة و ندهنوها كدلك بالزبدة
و نضيفوا التفريشة الثانية = لى هى البصل و البيض و نوضوعوا فوقوا الورقة بعدها التفريشة ديال الكاوكاو و نغطيو البسطيلة بالورقة من كل الجوانب
نخليكم مع الصور
ندهنوا البسطيلة بالزبدة و ندخلوها للفرن و ها البسطيلة و اجدة و لديدة بزاف
