خلطة الكبدة الاسكندراني

خلطة الكبدة الاسكندراني

و رحمة الله و بركاتة النهاردة ان شاء الله هقدملكم كبدة اسكندرانى اجمل مليوون مرة من بتاعة برة :)) يالا نبدا:


المقادير:


-نصف كيلو كبدة بقرى مقطعة تقطيعة الشاورما


-عدد 6 فصوص ثوم


-فلفل حار حسب الرغبه(انا استعملت 5 قرون الصغيرين اووي)


-فلفل رومي(انا استعملت نص حبه)


-معلقة شاى ملح


-ربع ملعقة فلفل اسود


-معلقة شاى ممتلئة كمون


-ليمونه


-مقدار غطاء خل


-زيت

دية صورة الكبدة هنحطها فمصفاة و نحط عليها ليمون و نشطفها بسيط بالماء انا بملى كوباية مية و ادلقها عليها و هى بالمصفاة متحولوش تغسلوها اكتر من كدة عشان متشدش فالطعام و تفقد قيمتها

الطريقه:


-هبشر الثوم و اقطع الفلفل الحار حلقات صغار جدااا و احطهم فطبق و احط عليهم الملح و الفلفل و الكمون و الخل و الليمون

واقطع الفلفل الاخضر الرومى شرائح

نسخن طاسة على النار تيفال او اي نوع ميلزقش نسخنها كويس جداااا و نحط بها زيت ملعقتين طعام كدة و لمى تسخن كويس انزل بالكبدة بس ملاحظة مهمة جدا جدا اننا مش نملى الطاسة عشان الكبدة متنزلش ميتها و تبقى مش روعة انا قسمتهم على طاستين او يمكن تعملوهم فنفس الطاسة دفعتين


ننزل بالكبدة نقلبها تقليبتين بس تغير لونها و اشيلها و احط الدفعة الثانية =اقلبها تقليبتين برضو تغير لونها و ثم احط الدفعتين على بعض يارب تكونو فهمتوني

بعد كدة انزل بنصف الخلطة اللى عملتها من شوية فاكرينها اللى هى الثوم و الفلفل الحار و الملح و الفلفل و الكمون و الليمون و الخل انزل بنصها بس و اسيب النصف الثاني زى ما هو

واقلب الكبدة و اغطيها و اسيبها عشر دقايق تاخد و تدى مع نفسها

بعد عشر دقايق هفتح على الكبدة احط النصف الثاني من خلطة الثوم و الفلفل الحار و اقلب و ثم احط الفلفل الاخضر المقطع شرائح و مغطيش عليها و اسيبها دقايق تكمل سواها بالكتير 5 دقيقة او اقل عشان الصوص الرائع اللى بالكبدة مينشفش و الصوص دة هنستخدمو فالساندوتشات بيكوون تححفه

-ودوقوا اجمل طبق كبدة اسكندراني

ولو عاوزين تعملوها ساندوتشات هاتو الخبز اللى عاملينو بالبيت بالتاكيد و نحط عليها طحينة و طماطم و خص و كبدة و ثم نحط شوية من صوص الكبدة و شوية من البيبر صوص اللى هو صوص الفلفل الاحمر دة بيصبح حامى اوى او يمكن تستغنو عنو و تلفو الساندويتش و بيتقدم مع خيار مخلل و بجد هتدوقوا ساندويتش كبدة اجمل و انضف من برة بمرااحل و بالهنا و الشفا

ودة زووم على الساندويتش

-والى اللقاء فمقال اخرباذن الله :) فامان الله

• خلطه الكبده الاسكندراني